Ka Taiew Ba-lai Ha Ka Por Lent (Third Sunday of Lent)

Ïa ka jingpule banyngkong la shim na ka Kitab Eksodos 20:1 – 17, ïa ka jingpule baar pat la shim na ka Shithi banyngkong u Paulus Apostol sha ki Korin 1:22 – 25. Bad ïa ka Kospel pat la shim na ka Kospel Bakhuid katkum u Ïoanis 2:13 – 25.

Psalms 19:8 – 11.

Mynta ngi don ha ka Taiew Ba-lai jong ka Aiom Lent. Ha kane ka taiew, u Blei U pynkynmaw ïa ngi shaphang ka jinglong bakhraw bor ka jong U bad ba ngi dei hok ban mane tang ïa U hi.

Ha ka jingpule ka banyngkong ïa kaba la shim na ka Kitab Eksodos, ngi shem ba u Blei Um shym kwah ba ngin mane blei thaw. Namar ba dei tang ma U hi u Blei ba-im ïa uba ngi dei hok ban mane.

Blei Thaw: Ha ka jutang barim ngi shem ba ki paid Israel ki la mane blei thaw namar ka jingbym lahshah ka jong ki ïa ki jingeh, haba ki khmih lynti ba u Blei ba ki mane Un leh ki kam phylla tang shikhyllipmat bad ha ka por ba ki kyrpad kin ïoh noh kloi. Hooid u Blei U lah ban leh ki kam phylla tang ha ka por ba khyndiat eh ruh hynrei, ha shuwa kata U da bishar hok bad bniah ïa ka lynti jingim ka jong ngi ki briew ba haduh katno ngi ieid bad shaniah tylli tang ha U hi. Naba ha u Blei don ka jingkyrkhu bad ka jingtim. Kawei na ki Un sa pyntreikam katkum ka jingim jinglong ka jong ngi ki briew. Haba ngi leh ïa kano kano ka kam bad lada ngi im ha kano kano ka jait jingim ruh, shishien ba ngi burom, ngi ieid bad ñiewkor ïa ka jingieid, ka Hukum ka jong U te, ka jingkyrkhu ka synran lang ha syndah bad ngi. Hynrei, lada ngi haram bad leh bym suidñiew ïa ki Hukum jong U te ka jingtim bad ka jingbitar shla kan bud nadien jong ngi.

Dei halor kata ka nongrim kaba la pynlong ïa U ba Un ai da ki 10 tylli ki Hukum lyngba jong u Moses ba ngin bud khang ba ngin dup ïaid beit ka jingim bad ba ngin nang ban tieng bad burom ïa U. Kine baroh ki dei ki lad jinghikai ba ngin dup im bha ha ka jinglong batlot jong ka jinglong briew ka jong ngi.

Te ka mut aiu ka jingmane blei thaw? Haba ong mane blei thaw kam shym mut eh tang ïa ka jingmane ïa ki dur mot ba la thaw da ka kti jong ki briew bad ban pynïahap kyrdan blei ïa ki hynrei, ka jingmut bajylliew hi ka thew ruh kum ïa kiei kiei baroh kiba teh mraw ïa ka jingim ka jong ngi. Nuksa, lada ka kamai kajih, ka khaïi pateng ka jong ngi ki briew ka khanglad ïa ngi ba ngin mane ïa u Blei, te kata ka kam jong ngi ka dei ka jingmane blei thaw; ka jingkyrni ka jong ngi ha ka dih buaid tanglang, ka bam kwai duma, ka jinglalot, ka jingkwah rhah, ka jingmlien basniew baroh, ka jingkyrni ha ka peit mobile, ka peit TV bad kum kine ki jait ka khanglad ba ngin ïajan bad u Blei te, ka long ba ngi mane blei thaw. Ha kano ka rukom ka long kumta? Baroh hi ka long ba, ngi pynhiar kyrdan ïa ka jinglong jong u Blei ha kum kita kiei kiei baroh ba ngim don por shuh ïa U. Bad U ïai pynkynmaw ruh ïa ngi ba ngi dei ban burom bad ñiewkor ïa ka Sngi jong U (Ka Sngi u Blei lane ka Sngi u Trai, Sunday), naba ma U hi U la pynkyntang ïa ka! Te na kata ka daw to ngin sumar khuid ïa ka Sngi jong U.

Ka jingpule ba-ar ruh ka bteng ban hikai bad ai jingsneng ïa ngi ba ngim dei satia ban leh stad leh nang nalor ki kam jong u Blei. Naba,

²⁵ “Kata kaba i kum ka jingbiej u Blei, ka kham stad ïa ka jingstad ki briew, bad kata kaba i kum ka jingtlot u Blei, ka kham khlaiñ ïa ka jingkhlaiñ ki briew.”

Ka Kospel ka pynshai shuh shuh ba, ngi dei ban da pyrkhat bad im sani bha ha ka jinglong Khristan bashisha ka jong ngi. Ngim dei ban ïalehkai bad ka jingim, ngim dei ban kheiñ thala ïa ki jinghikai bahok bad ba shisha lyngba jong ka Balang Bakhuid ka jong u Blei. Ki 10 tylli ki Hukum jong u Blei ki dei ki mawjam sha ka jingim lawei ka jong ngi kum kiba ngeit.

U Blei, U pynkynmaw ruh ba wat ha ki ïingmane lane ki ïingkhuid-ïingkyntang jong U ngim dei satia ban leh khlemakor la ka long ka ka ktien ka thylliej bad ki kam ki jam jong ngi. Ai ba ka ïingmane kan long kaba khuid bad kaba kyntang. Namar kam dei ka ïing kaba ngi shong ngi sah hynrei, ka dei ka ïing kaba ngi mane ïa U.

¹⁶ “…Wat pynlong jaka ïew ïa ka ïing u Kpa jong Nga!”

¹⁷ “Ki synran jong U ki la kynmaw ïa kaba la long ha ka Jynthoh, “Ka jingieid shitrhem jong Nga ïa ka ïing jong Me, kam bam-duh ïa nga.””

Hangne, u Jisu U pynkynmaw ruh shaphang ka jingshah shitom bad ka jingïap kaba Un shah ha ryngkat ka jingmihpat badonburom bad ba khlaiñbor ka jong U ha ka por Paskha.

To ai ko hynmen-para baroh ba ka jingim babha ka jong ngi da kaba bud bad ñiewkor ïa ki 10 tylli ki Hukum jong u Blei ka pynjanai bad btin lynti ïa ngi lang baroh sha ka lawei ba phyrnai jong ka hok ka sot jong ka ri kaba U la kular.

Yn ïaroh ïa u Jisu Khrist, junom la junom. Amen.