Ka Sngi U Trai Lait-Ïa Ba Arphew San (Twenty-fifth Sunday In Ordinary Time)

Ïa ka jingpule banyngkong la shim na ka kitab u Amos 8:4 – 7, ïa ka jingpule ba-ar pat la shim na ka shithi banyngkong jong u Paulus Apostol sha u Timotheus 3:1 – 8. Bad ïa ka Kospel pat la shim na ka Kospel Bakhuid katkum u Lukas 16:1 – 13 (10 – 13).

Psalm 113:1bc – 2, 4 – 6, 7 – 8 (R. peit 1a, 7a).

Ka Jingkwah Rhah

Ngim lah ban len ïa ka jingshisha ba baroh nga ngi ngi donkam ïa ka spah ka phew ban im ha pyrthei, namar khlem ma ka ngim lah ban ïaid shaphrang ha ka die ka thied bad kiwei de ki jingdonkam hynrei, kam dei pat ban long ka daw jong ka jingsniew ïa ngi. Ka spah kam dei ban long ka daw jong ka jinglalot, ka jingrhah, ka lynti sha ka jingsniew ba bun rukom. Ngim ju dei ban klet ïa kane kawei ba, ka jingsniew hi barabor ka mih na ka dohnud jong ngi ki briew. Namar ba ngi kwah ban tare ïa ka spah ka hajar ha ka pyrthei ngi threw bad ka dohnud ka jong ngi ka sdang ban kwah bad kane ka pynlong ïa ngi ban ïohi ïa kaei kaei kaba ngim dei ban ïohi bad ban leh ïa kaei kaei kaba ngim dei satia ban leh.

Namar jong ka jingkwah rhah bad ka jingkhwan lalot kan sa ïalam ïa ngi baroh ban bam ei wat ïa ka umsyep jong ki baduk batoi ym tang katta, ngin sa pynïap ruh ïa ki ha ki bun ki rukom! Te namar kata, to ngin ïa husiar ïa la ka jingim shimet shimet ban bud dien ïa ka jinghikai jong ka Balang bad ban im ha ka hok ka sot bad ka tip-briew tip-blei.

Ka Jingkieng

Ki Khasi ki ngeit ïa ka jingkieng ksiar hyndai ba u khun bynriew u ju kiew ju hiar lyngba jong ka ban bha ka leit ka wan na khyndw sha bneng. Kane ka thew ruh ïa ka juk kaba im ha ka hok jong ka tip-briew tip-blei. Kumta hadien ba ka pap ka sang ka la sdang ban synshar ïa ka longrynïeng jong ngi ki briew mano shuh ban pynmanbha ïa ngi? Dei hangne keiñ ba u Jisu Khrist Uba long u Khun phrangsngi jong u Kpa Bahalor tam U la kylla long u ksiang hapdeng jong ngi bad u Blei. U long kum ka jingkieng hapdeng jong ngi bad u Nongthaw.

U Paulus Apostol u kyntu ïa ngi baroh naduh kiba khraw kyrdan haduh ki rit ki ria ban mane ïa u Blei bashisha bad Uba im. U pynkynmaw ruh ïa ngi ba dei tang u Jisu bad lyngba jong U hi ngin sa lah ban ïoh biang ïa ka jinglong khun-blei ïa kaba la sloit noh na ngi shipor da ka pap ka sang. U kwah ruh ba ngin duwai barabor bad ban pynthylli ïa lade ha u Blei.

U Jisu hi da lade u hikai ïa baroh ban beit ka jingthmu bad ban nym kyllaiñ ka rukom pyrkhat bad ka rukom im bad kata hi ka long ba ngim dei ban shakri ar kynrad. Namar lada ngi shakri ar kynrad khlem pep kan sa don jingthut bad jingduna ha ka jingïadei kam jong ngi bad ki.

“Jar uba leh hok ha ki kam barit baria, un leh hok ha ki kam bakhraw; jar uba leh klop ha ki kam barit, un leh klop ha ki kam ki bakhraw.” (Lukas 16:10).

“… Phim lah ban shakri ïa u Blei bad ïa ka spah.” (Lukas 16:13)

Yn ïaroh ïa u Jisu Khrist.

Junom la junom. Amen.