Ïa ka jingpule banyngkong la shim na ka Kitab Phawar 8:22 – 31, ïa ka jingpule baar pat la shim na ka Shithi banyngkong u Paulus Apostol sha ki Roman 5:1 – 5. Bad ïa ka Kospel pat la shim na ka Kospel Bakhuid katkum u Ïoannis 16:12 – 15.
Psalm 8:4 – 5, 6 – 7, 8 – 9 (Pule 2ab).
Ka jingpule banyngkong ka ïathuh shai ba ka jingieid jong u Blei ïa ngi ki briew ka khraw haduh katta katta. Kumjuh ruh ka ïathuh ba ka jingim ka jong ngi ka wan na u Blei Uba long ka thymmei bad ka tlong jong ka jingim bad ka jingbha. Kumta ïa ngi la pynmanhok da ka jingieid jong U.
Na ka jingpule baar ngi shem ba la pynmanhok ïa ngi da ka jingngeit ha u Blei lyngba u Trai jong ngi u Jisu Khrist.
1 Namarkata, haba la pynmanhok ïa ngi da ka jingngeit, ngi la ïasuk bad u Blei lyngba u Trai jong ngi u Jisu Khrist.
Te kumta ngi im ha ka jingkyrmen bad shadkmen ha ka jingaiei jong u Blei ha man la ki sngi jong ka jingim ka jong ngi. Wat hapdeng jong ka jingjynjar ruh ngi kmen namar ka jingkyrkhu jong u Blei ka don bad ngi ban aibor bad ïarap ïa ngi ban ïaleh pyrshah ïa ka.
Kumta ïa u soh la ïoh ha kane ka rukom: jingjynjar = jingïaishah satar = mynsiem rangbah = jingkyrmen = ym don jingbabe. Dei lyngba jong u Mynsiem Bakhuid ba ngin sa lah ban ïoh bor bad jingshngaiñ ba thikna.
Ka Kospel ka pynkynmaw ïa ngi shaphang ka jingkhraw jong ka Triniti (Trinity) kaba mut lai person ha uwei u Blei. U Blei jong ngi U dei u Blei laiwei; u Kpa, u Khun bad u Mynsiem Bakhuid ki ïa long kawei. Te kaei kaei kaba u Jisu um lah ban ïathuh lut ha ngi u Mynsiem Bakhuid u leh ïa kata ka kam kaba dang sah baroh. Kumta ngi ïoh ïa ka jingkyrmen kaba khraw ba u Mynsiem Bakhuid u don ryngkat bad ngi.
Ai ba ka jingim jong ngi kan san ha ka jingngeit bad ka jingieid ïa u Blei Uba khrawbor bad Uba im junom.
Yn ïaroh ïa u Jisu Khrist, junom la junom. Amen.
){kind=link}
0 Comments