Ka Taiew Ba-ar Ha Ka Por Lent (Second Sunday of Lent)

Ïa ka jingpule banyngkong la shim na ka Kitab Jenesis 22:1 – 2, ïa ka jingpule ba-ar pat la shim na ka Shithi u Paulus Apostol sha ki Roman 8:31b-34. Bad ïa ka Kospel pat la shim na ka Kospel Bakhuid katkum u Markus 9:2 – 10.

Psalms 116:10 – 17.

Mynta ngi don ha ka Taiew Ba-ar jong ka Aiom Lent. Ka dei ruh ka por ba kham kyrpang bha ba ngin khmih bniah ïa la ka jong ka jingim mynsiem khnang ba ngin long kiba janai hakmnat ka khet isynei ka jong u Blei.

Ha ka jingpule ka banyngkong, ngi shem ba u Abraham u long shisha u briew uba bat skhem ïa ka Hukum jong u Blei bad u da kohnguh ruh ïa ka. Kata ka paw shai ha ka khyllipmat ba u mut ban kñia ïa la u jong u khun bamarwei jong u, u Isaak. Baroh hi ka dei tang ka jingtynjuh jong u Blei ïa u (Abraham) ba haduh katno u ieid bad kohnguh ïa u Blei.

Bad dei haba u Blei u la ïohi shisha ïa kata ka jingieid ka jong u Abraham ïa U ba U sa kyrkhu ïa u bad ki pateng jong u lyngba jong u angel u Trai.

¹⁶ “Da lade hi nga la smai, ong u Trai, namar phi la leh ïa kane, bad phim shym la bynnud ïa la u khun, ïa la u khun marwei, ¹⁷ Ngan kyrkhu ïa phi da shisha, Ngan pynroi ïa ki khun ki ksiew jong phi kat ki khlur ka bneng kat u shyiap harud duriaw. Ki khun ki ksiew jong phi kin sa khieh ïa ka khyrdop ki nongshun jong ki. ¹⁸ Da ki khun ki ksiew jong phi baroh ki jait bynriew ka pyrthei kin sa ïoh jingkyrkhu, namarba phi la kohnguh ïa ka ktien jong Nga.”

Ha ka jingpule ba-ar pat u Paulus Apostol u pynkynmaw ïa ngi ba ngim dei satia ban sheptieng lane ban artatien ïa ka jingim khamatam ha kaba ïadei bad ka jingïarap ka ban sa wan na u Blei, namarba u Blei u don ha ka liang ka jong ngi. Lymda kam long ha kata ka dur te balei hi Un pha ïa la u jong u Khun bamarwei jong U na ka bynta ka jong ngi. Haba u ai ïa la u jong u Khun bamarwei, U ai lang ruh bad shibun ki jingkyrkhu ki ba wan ryngkat bad u Jisu.

Ka Kospel kaba ngi pule mynta ka sngi pat ka ïathuh ha shaphang ka jingkylla dur jong u Jisu. Ka jingmut jong ka ka long ba haduh katno ka khraw ka burom jong u Blei! Ym don kaei kaei ha sla pyrthei ka ban kot kyrdan haba ngi ïanujor bad ka jingkhraw burom jong u Blei. Bad ruh kum ha kata ka por ba u Jisu u kylla dur ka sur jong u Blei ka kren ban pynshisha ba u Jisu hi u dei u Khun bamarwei jong U.

⁷ “Une U long u Khun ba-ieid jong Nga – to sngap ïa U!”

Ko hynmen para baieid baroh, na kine baroh lai tylli ki jingpule na ka Jingthoh Bakhuid ngi shem ba u Blei U ieid ïa ngi haduh katta katta haduh ba U la aiti noh la u jong U Khun baieid eh jong U, u Trai Jisu Khrist.

Ai ba ka jingngeit ka jong ngi kan btin lynti ïa ngi ban ieid kham janai ïa u Blei bad ban kohnguh skhem ïa ki Hukum jong U.

Yn ïaroh ïa u Jisu Khrist, junom la junom. Amen.