Ki Saw Aiom: Ha ka Blalang Katholik (Catholic Church) ngi don ïa ki Saw Aiom kumba long ha ka pyrthei Mariang bad kita ki long: Ka Aiom Adben (Advent), Ka Aiom Khristmas (Christmas), Ka Aiom Lent (Lent) bad Ka Aiom Paskha (Easter). Kumta da ka jingdon jong ngi ïa kine ki Aiom ka la pynriewspah ïa ka jinglong jingim jong ngi ki khun Khristan Katholic ha ka jingim mynsiem.
Ba ha kane ka jingthoh bad ka jingbatai kaba mynta ka sngi ngi kwah ban batai ïa phi shaphang ka jingmut bapura jong ka Aiom Lent. Kumba ngi baroh hi ngi la tip bad sngewthuh kumba la ju batai barabor da ki nongtrei Balang jong ngi ba, kane ka Aiom ka dei ka por jong ka jingshahshitom bad ka jingpisa jong u Jisu Khrist. Ka dei ruh ka por ha kaba u pynkhreh ïalade ban shahïap namar ki pap ki sang ki jong ngi.
Ka Jingkyllakabamut: Ha ka jingim mynsiem jong ngi kum ki khun Khristan Katholik, ngi tip bad sngewthuh shai ba ka Aiom Lent hi ka dei ka por jong ka jingkyllakabamut ka jong ngi na ki jinglong bymbha jong ka lynti ka jingim ka jong ngi. Ngi dei ban pynkhreh bah ïa la ka jingim ha ka rukom jinglong jingim ka jong ngi ba ngin kyllakabamut na ka jinglong kaba sinew nuksa kum na ka jinglorni, jingkyrni ha ka dih ka bam, ka jingawria, ka jingkhwan lalot bad kiwei kiwei de.
Kumta ka Balang ka khot ka wer ïa ngi baroh ba ngin jan sha ka synduk phla (confession), khnang ba ngin dup ïoh ïa ka map ka isynei na u Blei Trai Kynrad na ki pap ki sang ka jingtlot briew ka jong ngi.
Ka Jingpynkhreh Ïa Ka Jingim Bathymmai: Na ka jinghikai jong Ka Balang Katholik, ngi tip skhem ba ha ka por Paskha ngin sa khie-im bad ban im thymmai biang bad u Khrist sa shisien pat. Namarba ha ka Sngi Thohdieng Bakhuid (Good Friday) ngi ïap ïa ka pap ka sang ha ryngkat ka jingïap jong u Khrist halor ka Diengphna ha Kalbari. Ba dei lyngba kata ka jingïap ka jong ngi ïa ka jinglong bapop ka jong ngi ba ngin sa ïoh bynta biang ha ka jingim bathymmai ha ka por Paskha da ka jingmihpat ka jong U na ka jingïap.
0 Comments