Ka Ïing Bakhuid (Holy Family) – Ka Jingïathuhkhana Bad Ka Tynrai Jong Ka Jingieid, Jingkohnguh Bad Jingïatylli

Ka Ïing Bakhuid (Holy Family) ka kynthup ïa u Jisu, ka Maria bad u Joseph. Ha ka jingïathuhkhana Khristan, ka Ïing Bakhuid ka long ka nuksa kaba janai jong ka longïing kaba shemphang, kaba shong ha ka jingieid, ka jingkohnguh ïa u Blei bad ka jingïatylli hapdeng ki dkhot jong ka baroh. Ha ka pyrthei mynta kaba la dap da ki jingeh ha ki longïing-longsem, ka jingïaleh jong ka jingim, ka jingïaid jingïeng bad ka jingïapher jingmut, ka khubor jong ka Ïing Bakhuid ha Nazareth ka long kaba kongsan bad kaba janai tam ïa ngi.

Ka jingïathuhkhana jong ka Ïing Bakhuid ha Nazareth

Ha Nazareth, ka Ïing Bakhuid ka im ha ka jinglong ba sngewrit bad ka jingïadei jong ki ka long kaba dap da ka jingngeid. Ka Maria ka long ka kmie kaba shaniah pura ha u Blei, ka pdiang ïa ka jingthmu jong U da ka mynsiem kaba jai jai. U Joseph, uba long u kpa uba kohnguh bad uba sumar, u pdiang ïa ka jingkitkhlieh watla u la don ha ka jingartatien. U Jisu, naduh ka por ba U dang khynnah, U im ha ka longïing kaba ai ïa U ka jinghikai kaba skhem ha ka jingngeit bad ka jingim kaba bha ha ka imlang-sahlang.

Ka longïing-longsem jong ki kam shym la lait na ka jingeh: kum ka jingïaid sha Bethlehem, ka jingïaid lynti sha Egypt ban phet na ka jingma, bad ka jingim kaba rit mynsiem ha Nazareth. Hynrei ha man la ka jingïaleh, ki ïaibteng ban shaniah ha u Blei bad ban ïatreilang kum ka ïing kaba skhem nongrim ha U.

Ka khubor bad ka jinghikai ïa ki longïing-longsem ha kane ka juk mynta

Ka Ïing Bakhuid ka ai ïa ngi shibun ki jinghikai:

1. Jingieid bad jingïatylli:

Ka jingieid ha ka Ïing ka sem Bakhuid kam dei tang ka jingsngew hynrei ka long ka jingkular. Ka jingieid kaba ïaishah bad kaba ju lehbha ka pynskhem ïa ka longïing-longsem.

2. Jingkohnguh ïa U Blei:

Ka Maria bad u Joseph ki kohnguh watla kim sngewthuh pura ïa ka jingïaid lynti jong ki. Kane ka hikai ïa ngi ban shaniah ha u Blei ha man la ki por kum shiïing-shisem.

3. Jingkitkhlieh bad jingïarap:

U Joseph u ai ka nuksa kum u kpa uba sumar, uba trei shitom ban kyrshan ïa ka longïing-longsem. Kane ka hikai ïa ki kmie ki kpa ka juk mynta ban long ki nongsumar bad ki nonghikai kiba bha bad kiba don ka jingkitkhlieh ba pura.

4. Jingim ba duk hynrei ba kyrhai ha ka mynsiem:

Ka Ïing Bakhuid kam shym la im ha ka jingriewspah jong ka pyrthei, hynrei ka la im ha ka jingriewspah jong ka mynsiem. Kane ka pynshisha bad ka pynthikna ïa ngi ba ka jingkmen kaba shisha ka wan na ka jingïatylli bad jingïadei kaba bha ha la ïing la sem.

Ka longïing Khristan kum ha “Nazareth”

Man la ka longïing Khristan ka lah ban long kum ka ïing- ka sem ha Nazareth – ka jaka kaba u Jisu U im bad U trei. Da ka jingieid, jingsuk, ka jingïakren kaba bha, ka jingïam, jingïakmen lang bad ka jingduwai, jingïaroh ïa u Blei, ka longïing ka kylla long ka jaka mane Blei bad ka ïingmane barit; namar ha ka ka don ïa ki daw jong ka jingbha baroh.

Ka jingpynkynmaw

Ka Ïing Bakhuid ka khot ïa ngi ban pynskhem ïa ki longïing jong ngi ha ka jingngeit, ka jingieid bad ka jingïatylli. Ha ka pyrthei kaba kylla stet, ka jingïathuhkhana jong ka Ïing Bakhuid ka pynkynmaw ïa ngi ba ki longïing Khristan ki dei ki ban long ki jaka ha kaba u Blei Un shongsah barabor kum u rishot baskhem. Kumta ki longïing kiba shong ha ryngkat bad u Blei, ki im bad ki long kiba dap da ka jingkmen bad ka jingsuk barabor.