Ka Sngi U Trai Lait-Ïa Ba Arphew Lai (Twenty Third Sunday In Ordinary Time)

Ïa ka jingpule banyngkong la shim na ka Kitab u Jingstad 9:13 – 18b, ïa ka jingpule ba-ar pat la shim na ka Shithi jong u Paulus Apostol sha u Philemon 9b – 10, 12 – 17. Bad ïa ka Kospel pat la shim na ka Kospel Bakhuid katkum u Lukas 14:25 – 33.

Psalm 90:3 – 4, 5 – 6, 12 – 13, 14 bad 17 (R. 1).

Ka Jingstad

Ka jingstad kaba shisha ka wan na u Blei ba halor tam, u Blei Uba im. Ngi ki briew ngim lah satia ban sngewthuh shai ïa kiei kiei baroh kiba don, ba long bad kiba jia ha ka pyrthei. Tang ka jingstad blei hi kaba lah ban pynsngewthuh bad pynshemphang ïa ngi shaphang bun kiei kiei kiba ha kane ka pyrthei bad kiba ha bneng naba, ngi long tang ki jingthaw jong U bad ngi tlot ruh ha bun ki liang.

¹⁶ “Ngim nang antad wat ïa kaba don ha ka khyndew; wat ïa kaba ngi kot kynjoh ruh ngi ïoh da kaba eh; te, mano keiñ uba lah ban shem don aïu ha bneng?”

Kumta ka jingstad ka wan tang na u Blei hi lyngba jong u Mynsiem Bakhuid jong U. Kane keiñ ka dei ka jingstad kaba shisha bad kaba pura. Naba ha pyrthei ngi ïoh tang ïa ka jingnang-jingtip haba ngi leit skul ban pule puthi. Te namar kata, ngim dei ban sngew sarong hynrei ngi dei ban long kiba sngewrit ka dohnud bad ban kynmaw ba ka thymmei jong ka jingstad ka dei na u Blei bad u Blei hi.

“Ka jingtiengburom ïa u Trai ka long ka jingsang jong ka jingstad, bad ka jingtip ïa u Bakhuid ka long da shisha ka jingshemphang.” Kitab Phawar 9:10.

Ban leh ïa kaei kaei donkam ban don ka jingieid bad ka jingmut kaba shai. Ngim dei ban shim tang ha lade ba kiei kiei baroh ki long kat kaba ngi thmu ne thew. Ngi donkam ban ïoh ruh ka jingmynjur jong kiba ngi ieid. Namar ha ka jingsngewrit u Mynsiem jong u Blei Un sa wan ban ïaid lang bad ngi bad ban btin lynti ïa ngi.

Ka Jingieid Bashisha

Ban ieid kam mut ba ngin shu lehbha malu mala lane tang ban shu ong ba ngi ieid ka lah biang. Em! U Jisu, U hikai ïa ngi ba ngi dei ban ieid ïa U naduh ka dohnud bad ka jingmut-jingpykhat jong ngi baroh. Kane ka long ka jingieid kaba aiti lut bad pynthylli ïalade ha ka.

“…phi dei ban ieid ïa u Trai u Blei jong phi da ka dohnud jong phi baroh, da ka jingmut jong phi baroh, da ka mynsiem jong phi baroh bad da ka bor jong phi baroh.” Markus 12:30.

Kumta u Jisu U kwah ba ma ngi kiba khot ïalade ki Khristan ngi dei ban long kiba beit ka jingthmu bad kiba rangbah ha ka rukom pyrkhat ba, kaei kaei kaba ngi leh kan ym dei ka jingpyrthuh bud ïa kiwei ne tang ban lait shah krenbeiñ ha kiwei. Haba ngi ong ba ngi ieid ïa U kamut ba ngi don ka deiti kaba khia namar ngi dei ban da pynshong nongrim bha ïa ka.

Ban ieid ka khia shibun ban ïa kaba shah ieid. Namar ka lyngkor jong ka jingieid ka dawa ïa ngi ban im ha ka riti synshar jong ka. Kumjuh ruh, ka diengphna ka la sakhi bad hikai ïa ngi ïa ka jinglen lade jong u Khrist.

Ngi dei ruh ban kynmaw barabor ba, ha shuwa ba ngin leh ïa kaei kaei ngi dei ban da pyrkhat bha, pynshong nongrim ïa ka bad ban tip ka mut aiu ban leh ne ban im ïa ka. Te kumta ngin sa long ki briew kiba jop ha ka jingim bad kiba lait na ka jingbakla kaba khraw.

Yn ïaroh ïa u Jisu Khrist.

Junom la junom. Amen.