Ka Sngi U Trai Lait-Ïa Ba Khatphra (Eighteenth Sunday In Ordinary Time)

Ïa ka jingpule banyngkong la shim na ka Kitab u Koheleth 1:2; 2:21 – 23, ïa ka jingpule ba-ar pat la shim na ka Shithi jong u Paulus Apostol sha ki Kolosse 3:1 – 5, 9 – 11. Bad ïa ka Kospel pat la shim na ka Kospel Bakhuid katkum u Lukas 12:13 – 21.

Psalm 90:3 – 4, 5 – 6, 12 – 13, 14 bad 17 (R. 1).

Ka Khana Lyngkot

Khyndiat nga kwah ban ïathuh ha phi shaphang jong kawei ka longïing kaba riewspah ïa kaba nga shem ha kawei na ki phlim Madras. Katba u kpa jong ka aktres u slem ban wan sha la ïing ha ka por mynmiet ka lok jong u ba ka khun (aktres) ki la khuslai bad lynga mynsiem haduh katta katta. Bad shiphang por u wan poi noh ha ryngkat ka jingkhia ka mynsiem ka jong u, te ki la ïa kylli kaei kaba la jia ïa u. Hynrei u la jubab ba ka khun jong u paralok jong u kaba dang shu dep ban sadi (shaadi) ka la pynïap (sucide) noh ïalade nambar ba kam suk ban im ryngkat bad u briew uba kam da ieid hok, namar ba u dei uba ki shu hun ki kmie ki kpa (arranged marriage). Mar kumta hi kata ka aktres ka jaw ummat ban pyrkhat ïalade. Te u kpa jong ka u la kylli kaei kaba jia ïa ka bad ka ka la jubab ba ma ka ruh ka long kumjuh, kam ieid ïa u briew uba ki la ïabuh maki, hynrei ka ieid ïa u briew uba ju wan die khokhubor man la ka sngi.

Katba ka kmie bad u kpa ki dang ïam sngewsih ka la leit ban kren ïa ki bad ka ong, kan myntoi aiu ba phin ïam? U paralok jong phi u don lut katba u kwah phewse u duh noh ïa la ka jong ka khun. Hynrei ma phi pat ka spah ka hajar ruh phi don bad nga ruh nga dang im te balei ba phin ïam. Kaba donkam ïa phi mynta ban leh ka long kane: ba phi dei ban sngewthuh bad ban ieid ïa nga.

Kane ka long tang ka khana kaba lyngkot kaba nga ïathuh ha phi bad ka don ïa ka khubor ban ai ha ngi.

Ka Khubor

Te haba ngi phai ruh sha kine ki lai tylli ki jingpule na ka Jutang Barim bad ba Thymmai ka khubor kaba u Blei U kwah ban ai ha ngi ka long kaba sngewtynnat haduh katta katta lada ngi pynshong nongrim bha ïa ka.

U Koheleth ha ka Kitab jong u u ïathuh ba jingim ka bun tang ka jingbynniaw bad ka jingbymler suda. Ka jingim ka mad tang ki jingeh bad ki jingkhuslai wat haduh ban da duh thiah duh dem. Kata baroh ka jia bad ka long namar ba ngi khuslai tang ïa kiei kiei kiba dei jong kane ka pyrthei hynrei ym ïa ka jingim mynsiem bad ka jingïadei ka jong ngi bad u Blei.

U Paulus Apostol pat u hikai bad pynkynmaw ruh ba ngi dei ki khun jong u Blei kiba la ïap ha ka pop bad la pynim biang ïa ngi da ka jingmihpat ka jong u Khrist. Kumta ngi dei ban im katkum ka saiñdur kaba u Blei U kwah bad ban pyrkhat lang ruh ïa ka jingim mynsiem kaba long kaba kham kor shibun.

La Wer Ïa Ngi Ban Pynïap Duh

Ïa kaei kata kaba ngi la shah wer ha u Paulus Apostol ban pynïap duh? Ka jingthmu jong u hi ha ka shithi jong u sha ki nong Kolosse ha kito ki por bad khamtam ruh ïa ngi ha kine ki por bad ki sngi kiba mynta ka long ba ngin dkhat jynduh ïa u kynjri jinglong mraw ka jong ngi ha kiei kiei kiba sinew bad ki bym khuid.

⁵ “To pynïap duh ïa kaei kaei kaba don ha phi, kaba dang ïadei bad ka khyndew: ka jingawria, ka jingbymkhuid, ka jingkwah brai, ka jingthrew basniew bad kato ka jingkangar kaba long ka jingmane bleithaw.”

Ka Jingmut Jong Ka Jingim Bashisha

Ka Kospel Ka la pynjanai ïa kane lynba ki kyntien jong u Jisu hi, ba ngi dei ban im sngi tang ïa kiei kiei kiba ai jingim ba pura ïa ngi. La mana ïa ngi ban kwah rhah bad ban khwan namar ka dei ka jinglong kaba sniew bad kaba u Blei hi Um da sngewbha ïa kum kata ka jait.

¹⁵ … “To kiar na ki jait jingkhwan lalot baroh; namar ka jingim bashisha jong u briew kam dei satia ha ka jingpahuh hai hai kaba u don.”

Ban lum lang ïa baroh, ka jingsneng na ka khana lyngkot haneng bad khamtam na ki Jingpule kiba la kren ha ngi, ngi shem ba u Blei U kwah da shisha ba ngin im hok bad ban kiar na ka jingsniew bad na kiei kiei kiba ka pyrthei ka tyrwa bad ruh ban kynshew ïa ka spah bneng ym ïa ka spah pyrthei.

Yn ïaroh ïa u Jisu Khrist.

Junom la junom. Amen.