Ka Taïew Ba Hynriew Jong Ka Paskha (Sixth Sunday Of Easter)

Ïa ka jingpule banyngkong la shim na ka Kam Ki Apostol 15:1 – 2, 22 – 29, ïa ka jingpule ba-ar pat la shim na ka Kitab Jingpynpaw 21:10 – 14, 21 – 23. Bad ïa ka Kospel pat la shim na ka Kospel Bakhuid katkum u Ïoannis 14:23 – 29.

Psalm 67:2 – 3, 5 – 6 bad 8 (R.4).

Ka jingdon ïa u Jisu:

Kumba ngi shem na ka jingpule banyngkong, u Paulus Apostol bad u Barnabas ki dei ki rangbah briew kiba ieid Blei bad kiba tieng burom ïa U. Na ka jinshlur jong ki ban phla ïa la ka jingngeit la ïasoh lang bad ki da u Barsabbas bad u Silas ban shimti ïa ka Kam babha jong ka Balang. U Mynsiem Bakhuid u don ha ka Balang bad U dei ma u Uba ju ai jingmut babha bad pasiaw ha ka Balang lyngba jong ki nongpeit – nongkhmih kiba don ha ka. Kumta ban seisoh ka jingim ha ki kam ki babha la bthah ïa ngi ban kiar na ki kam ki bym khuid bad ki bym ïadei dur katkum ki jinghikai jong Ka Balang.

Ka Nongbah bapura bad bashisha:

Lada ngi pyrkhat sani ngin sa shem ba kaei kaei kaba wan na u Blei ki long kiba janai bad kaba pura.

Ka Jingkohnguh:

Ban long ki nongtrei babha ha ka Balang bad ha ka imlang – sahlang ngi dei ban long kiba kohnguh. Ïano ngi dei ban kohnguh? Haba kren halor kane ka bynta ka jingkohnguh hi ka dei ïa u Blei, kam pher lada dei ki Khristan ne kiwei pat ki jait jingngeit ngi tip bad sngewthuh shai ba kiei kiei kiba bha ki wan na u Blei ba ki jingpyrsad mynsiem jong U ki long kiba bha. U Khasi u ngeit ïa kane kawei bad kata ka long ban kamai ïa ka hok. U Blei U ai bor – ai sor ïa ngi bad u ai ruh ha ngi ïa ka jingsuk kaba janai tam kaba ïapher bak lybak na ka jingsuk ba ka pyrthei ka tyrwa.

Dei halor kata ka nongrim ba haba ngi don ïa u Jisu ngi ïoh jingsuk kaba pura.

Yn ïaroh ïa u Jisu Khrist.

Junom la junom. Amen.