Ka Taïew Ba Hynñiew Jong Ka Paskha (Seventh Sunday of Easter)

Ïa ka jingpule banyngkong la shim na ka Kam Ki Apostol 1:1 – 11, ïa ka jingpule ba-ar pat la shim na ka Shithi sha ki Hebru 9:24 – 28, 10:19 – 23. Bad ïa ka Kospel pat la shim na ka Kospel Bakhuid katkum u Lukas 24:46 – 53.

Psalm 47:2 – 3, 6 – 7, 8 – 9 (R. 6).

Ka Jingkiew Jong U Jisu Sha Bneng

Hato Ka Bneng Ka Don?

Ha ka jingpule banyngkong na ka kaba dei na ka Kam jong ki Apostol la ïathuh bad pynshisha ha ngi ba u Jisu Khrist U la kiew sha bneng ha ka por bad ka-ïa kaba biang kumba u Kpa bneng U la ibit ïa U. Kane ka pynshisha ha ngi ba ka bneng ka don. Ïa kane la sakhi da ki Apostol hi kiba la ju ïai don barabor bad U.

 

U Nongmih Bujli:

Uei uta uban mih bujli ha ka jaka jong u Khrist hadien ba U la kiew sha bneng? Baroh hi ngi tip shai shaphang kata ba u nongmih bujli jong u Jisu u dei u Mynsiem Bakhuid. Bad kata ka wanrah ïa ka jingaiei-blei kaba khraw ha kaba ngi baroh ngi ïoh ïa ka jingshlur ban long ki sakhi babha bad kiba ïaineh jong U.

Ha ryngkat ka jingdon lang jong u Blei u Kpa ba u Jisu U kiew sha bneng. Ïa kata ngi tip bad sngewthuh shai ba kumba la batai ïa ngi ha ka Jutang Barim ba ka jingdon jong u lyoh ka thew ïa ka jingdon jong u Blei. Phi lah ban pule ïa ka kot shaphang Ki Dak Ki Shin Khristan kaba la thoh da I Fr. Breson Paul Ranee, khnang ba phin dup sngewthuh kham shai bad kham bniah.

Ka Bneng Bashisha:

Ha ka jingpule ba-ar ngi shem ba ka Bneng ka long ka bashisha. Baroh ki jingbha bad ka jingsuk kiba ngi ïoh ha ka pyrthei ki dei tang ki nuksa (copy/example) jong ka jinglong bashisha jong ka bneng ka bashisha.

U Khrist kum u jingkñia bahok bad ba-im U la kñia ïalade tang shisien na ka bynta ban pynim ïa ngi baroh. Namar U la dep tip shai ba ma ngi baroh ngin sa iehnoh ha kawei ka sngi ïa ka jingim kaba ha sla pyrthei bad ngin hap ban shah tian bishar hakhmat jong u Blei te, kumta ka jingïap bad ka jingmihpat jong u Khrist ka pynkhuid ïa ngi na ka pap ka sang bad ka ai jingsuk jingkmen bad ka jingkyrmen ïa ngi baroh. Bad kane ka jingkiew jong u Jisu sha bneng ka ai ïa ka khubor jong ka jingkyrmen na ka bynta jong ngi baroh kiba ngeit ha U ba ha akher ka sngi ngi baroh ngin ïoh ka lad ban leit ryngkat bad U sha bneng.

Ha ka Kospel pat ngi shem ba la pynkynmaw biang ha ngi ïa kiei kiei baroh kiba la jia shaphang jong u Khrist ka long kumba la thoh.

Ka Khubor Jingpynim:

Da ka jingshah shitom, ka jingïap bad ka jingmihpat ka jong u Khrist la siewspah ïa ka pyrthei hi baroh kawei. Kumta la bthah ruh ba ngin pynbna ïa ka khubor jong ka jingkylla kabamut bad ka jingmap-ei ka jong u Blei ïa ngi ki briew baroh.

⁴⁷ “…ba ha ka kyrteng jong U dei ban ïalap ï aka jingkylla ka bamut bad ka jingmap pop ha ki jait bynriew baroh…”

Ïa kane ka kam (Mission) la aiti ym tang ha ki Apostol ha kito ki por hynrei la aiti lang ha ngi ruh kiba ngeit ha U. Bad u Blei Um shym la iehnoh ïa ngi ban leh ïa kata tang da ka jingstad lane ka jinglah kum ki briew hynrei U la phah ïa u Mynsiem Bakhuid ban synran lang ïa ngi ha ki kam babha baroh.

To ai ba ka jingkyrkhu jong u Blei kan shongsah bad ngi bad u Mynsiem Bakhuid hi Un nang ïai synran ïa ngi barabor khnang ban gin dup long ki sakhi bashisha bad kiba ïaineh jong U ha ka pyrthei.

Yn ïaroh ïa u Jisu Khrist.

Junom la junom. Amen.