Ka Sngi U Trai Pentecost: Ka Jingwanhiar u Mynsiem Bakhuid

Ïa ka jingpule banyngkong la shim na Ki Kam jong ki Apostol 2:1 – 11, ïa ka jingpule baar pat la shim na ka Shithi banyngkong u Paulus Apostol sha ki Korin 12: 3b – 7, 12 – 13. Bad ïa ka Kospel pat la shim na ka Kospel Bakhuid katkum u Ïoanis 20:19 – 23.

Psalms 104:1ab & 24ac, 29bc – 30, 31 & 34 (R. peit 30).

Ka ktien U Blei na ki kam jong ki Apostel ka iathuh iangi shaphang kumno u Mynsiem Bakhuid U wan hiar halor jong ki Apostel bad u la ktah lut ia baroh ki briew kiba la ialum lang ha kata ka sngi. Kane ka jingjia kaba pylla kala pynkyndit bad ki buh ia kine ki briew ia ka jingkylli kumne:

“Kine ki briew kiba kren kumne ki long ki nong Galialea! Te kumno kieñ ngi baroh ngi la iohsngew ba ki kren ha ka ktien trai jong ngi hi?” (Kam: 2:7-8)

Hoioid, haba U Mynsiem Bakhuid u hiar hangi un kren da ki ktien lajong jong ngi hi ym da ka ktien nongwei khnang ba  ngin sngewthuh shai kdar bad ba ngin pdiang iaka jingaiei jong u Mynsiem Bakhuid ha ka jingim lajong jongngi. Paralok baroh hato phi dang shong ha kata ka jinglyngngoh? Em to ngin plie iaka khyrdop jingkhang jong ngi bad sa shisien mynta ka sngi ngi  khot kyrpang eh ia u Mynsiem Bakhuid ba un hiar halor jong ngi bad un kren da ki ktien trai jong ngi hi khnang ba ngin im ka jingim kaba kmen bad ba dam jingsuk kyrhai.

Ka jingpule ka baar ruh ka pyntikna iangi ba man “Ha u wei pa uwei u briew la ai iaka jing pynpaw u Mynsiem naka bynta ka jingbhalang.” (Kor 12: 7) To ngin ia puson halade kaei kieñ kane ka jingaiei lane ka jingpynpaw ba u Mynsiem bakhuid U la ai hanga naka bynta ka jingbha lang jongbaroh ki jingthaw jong U? Lada nga lah pyndonkam bha iakane ka jingpynpaw sahngeh shiphang ban ainguh ia u Blei Trai Kynrad ia kiei kiei baroh kiba bha kiba lyngba jong phi U Blei u la lah ban pynpaw shibun ki kam jong U hakiwei pat. Bad lada ngam pat leh ei ei kylli ialade kaei kaba pynlong ianga ban ngam lah ban ai nongrim  ia u Mynsiem Bakhuid ban pynpaw ia ki kam bakhraw jong u lyngba jongnga?

To mynta ka Sngi ngin phai sha U Mynsiem Bakhuid ban pynpaw bad pyni iaka lynti jong phi ban ieid bad shakri ia U Blei ha bunbah ki liang ka kum ka bynta ba u la pynmng ia ngi.

Ka Kospel ka pynkynmaw biang ia ngi ba u Jisu u la pynsleh iangi da u Mynsiem Bakhuid “To pdiang ia u Mynsiem Bakhuid”. (Ïo: 20:22) U Jisu u la pyrsad ha ngi ia U Mynsiem Bakhuid bad ka kamram jong ngi ka long ba ngin im ka jingim kaba pura lyngba ki kam kiba rit kiba ngi trei mynla ka sngi.

Ha ka jing jai jai ka mynsiem jong ngi to ngin ai por shiphang ban khot bad ban pdiang ia u Mynsiem Bakhuid ha ka jingim bad ka ing ka sem jong ngi.

 

Da i ----- H. Lynshing