Ka Sngi Balang Ber Dpei (Ash Wednesday)

Ïa Ka jingpule banyngkong la shim na Ka Kitab jong u Joel 2:12 – 18, ïa ka jingpule ba-ar pat la shim na ka Shithi ba-ar jong u Paulus Apostol sha ki Korinth 5:20 – 6:2. Bad ïa ka Kospel pat la shim na ka Kospel Bakhuid katkum u Matheus 6:1 – 6, 16 – 18.

Psalms 51:3 – 4, 5 – 6ab, 12 – 13 bad 14 – 17 (R. peit 3a).

Ka la dei ka por ba ngin im da ka jingim bathymmai. Kumba baroh ngi tip bha ha ki Social Media bapher bapher ka khubor kaba kham khluit bad sngewtieng ka dei ka thma hapdeng jong ka ri Russia bad ka Ukraine. Balei kane ka leit jia haduh ban da poi u pud ban ïaleh thma? Baroh hi ka dei na ka jingbymdon Blei ha ka jingim shimet shimet. Shisien ba la shahteh mraw ha ka pap ka sang u soh jong ka dei kiei kiei kiba ym ïahap bad ka saiñdur jong u Blei.

Na ka jingpule banyngkong ngi ïohi ba u Blei U long Uba bha da shisha. Um ju kwah ba mano mano na ngi ngin ïap ka ka pap ka sang. Katba lah hi U ju ïai-wer ïai-khot ïa ngi ban phai-dien sha U. Balei nga ong phai-dien? Ka jingmut ka long ba ngi ngi la ïaid palat shakhmat ban ïa u Blei. Ha ka jingshisha, ha ka jingim Khristan ka jong ngi dei u Blei keiñ U ban ïaid shakhmat ban ïa ngi bad ba mangi ngin long ki nongbud ki jong U; ba dei halor kata hi ka nongrim ba ka don jingmut ka kyntien Khristan bad ka jinglong Khristan ka jong ngi iwei-pa-iwei.

Kumta u Prophet Joel, u pynkynmaw ïa ngi shaphang ka jinglong babha khlem out ka Jong u Blei. U slem ban bitar bad Uba kynrei ka jingieid bad ka jingmap. Namar kata to ngin ïa kyndit bynriew noh ïoh lap ba dier ka por, phai sha u Blei jong ngi Uba im ba ngin dup ïoh jingmap na ka pap ka sang ka jong ngi bad ba ngin dup ïoh im. Ka por ka la dawa ïa ngi ba ngin im sngi ha ki jingduwai bad ban kyllakabamut noh na ka jinglong bym bha ka jong ngi. Ha ryngkat ki Lyngdoh jong ka Ñiam Khristan to ngin ïa kubur ïalade ba ngi dei ki nongpop bad ban tyrwa ïa ka kñia ka khriam ha u Blei ban dup sait khuid ïa ngi na ka tngit jong ka pap ka sang.

U Paulus Apostol ka ka jingpule ba-ar u pynkynmaw ïa ngi ba ngi dei ki nonglam khubor jong u Blei. Lada ngi shem ba kiwei kim don ïa u Blei ha ka jingim ka jong ki te, ka dei hok ba ngi ruh ngin bishar bniah ïalade lada ngi don ne em ïa U!

 

Ka jinglong Khristan ka jong ngi jam shym kut satia tang ha ka jinglong nongbud ka jong ngi hynrei, ka don ka deiti bakhraw kaba la pynkhamti ha ngi iwei-pa-iwei bad kata hi ka long ba ngi dei ki nongrah lane ki nonglam khubor jong U. Shikyntien ban ong, ngi long kum ka kti kamon kti kadiang jong u Blei namar ba U trei ïa ki kam lyngba jong ngi ban pynïar ïa ka Hima Bneng.

Shuh shuh, u Blei, U kwah ïa ngi ba ngin long kiba sngewrit ka dohnud. Um kwah ba ngin sarong ïa ka kyrdan bad ka kam kaba ngi trei. Baroh ki jingleh-jingkam ki jong ngi ki dei ban long kiba bha bad kiba ïadei dur bad ka jingthmu ka jong u Blei. Ym donkam ba ngin pyrto ïalade bad ban kwah burom briew, ai ba Un tip tang u Blei hi bad ngi.

Yn iaroh ia u Jisu Khrist.

Junom la junom. Amen.