Ka Por Lent Banyngkong (First Sunday of Lent)

Ïa ka jingpule banyngkong la shim na ka Kitab Dewteronomi 26:4 – 10, ïa ka jingpule ba-ar pat la shim na ka Shithi Banyngkong jong u Paulus Apostol sha ki Roman 10:8 – 13. Bad ïa ka Kospel pat la shim na ka Kospel Bakhuid katkum u Lukas 4:1 – 13.

Psalms 91:1 – 2, 10 – 11, 12 – 13, 14 – 15 (R. peit na ka 15b).

Ngim lah satia ban len ba baroh napdeng jong ngi ngi long ki briew kiba bunkam bha ha kane ka juk kaba mynta bad ngi ïaleh katba lah ban trei shitom ha ka kamai kajih bad ka jingdurut ha ki kam ïing bad ka pule puthi ha ryngkat bad kiwei kiwei de ki jait kam. Kumta, ngim don por satia ban puson shaphang ka kam mynsiem wat lada ngi ïaleh katba lah ban poi sha ki ïingmane ha ki sngi khuid baroh.

Namar kata, ka Balang ka ai ha ngi ïa kane ka Aïom kaba ngin hap ban puson ïa la ka jingim bad ban pynleit jingmut ha ki kam mynsiem.

Ki sohnyngkong dei ki jingai jong u Blei ha ngi:

Ka jingpule banyngkong ka khot ka wer ïa ngi ba ngin im ha ka jingdon jong u Blei. Khlem ma U ngin ym lah ban im ha ka jingsuk bad ka jingkmen. Shibun ki jingeh bad ki jingjynjar ki tawiar ïa ka jingim ka jong ngi bad ban lait na ki kam dei satia ka kam kaba suk. Dei tagn ha U hi ba ka jingim ka jong ngi ka shngaiñ. Kumba U la pyllait ïa ki paid Israel na Ijipt bad ai ha ki ïa ka ri kaba U la kular, ka ri jong ka dud bad ka ngap.

⁹ “…U la ai ha ngi ïa kane ka ri,, ka ri kaba tuid da ka dud bad ka ngap”.

Phla da ka shyntur bad ngeit ha ka dohnud:

U Paulus Apostol ha ka shithi jong u sha ki nong Rome u pynkynmaw ïa ka jingthoh Bakhuid kaba ju sneng ju kyntu ïa ngi na ka por bad mynta ka sngi ka ong ba:

⁸ “Ka Ktien u Blei ka don hajan jong phi, ha ki rymmiang shyntur jong phi, bad ha ka dohnud jong phi”.

Lyngba jong kine ki kyntien ngi ïoh mynsiem wat hapdeng jong ki jingeh babun kiba ngi ïa kynduh. Ha kajuh ka por ka Ktien jong u Blei ka pynrem ïa ngi ba ki jingleh ki jong ngi bunsien kam ïadei dur bad jinghikai ka jong Ka. Lada ngi don shisha ïa Ka ha rymmiang shyntur bad ha ka dohnud ka jong ngi, ngin jin da la long kiba ïaryngkat dor bad ki apostol u Khrist. Te namar kata, to ngin ïa kut jingmut noh ha ka ne ka Aïom Lent ban sdang noh ban pule bad ban im da Ka.

¹¹ “Jar uba ngeit ha U, un ym babe lano lano ruh”.

¹³ “Jar uba khot kyrpad ïa ka kyrteng u Trai un lait-im”.

Ka jingpdiang ïa ka jingshisha bad im da ka:

Kaei kaba ngi shem ha kane ka pyrthei kaba mynta ka long ba ngim hun ïa kaei kaba ngi long bad dei hangta ba ngi hap bunsien ha ka pap ka sang, lait na kawei ngat sa ha kawei.pat. Imitation: kane ka kyntien ka don ïa ka jingmut jong ka cut and paste! Ka jingtynneng ïa kiwei bunsien ka ju ïalam bakla ïa ngi namar ba ngim long halade bad ngim im ha ka tynrai kaba ngi don.

Ka jingim jong u Jisu kaba ngi ïohsngew na ka Kospel mynta ka sngi ka ai jinghikai ïa ngi ba ngi dei ban im ïa ka jingim kaba ngi long bad ha ka tynrai kaba ngi don; ki Khristan ki dei ban im kum ki Khristan, ki Hindu ki dei ban im kum ki Hindu, ki Muslim ki dei ban im kum ki Muslim bad kumta ter ter. Bad ha la ka jong ka sap ka phong ngi dei ban pynkhie im ym ban shu tynneng ïa ka jinglong jong kiwei lane ban sarong ïa kaba ngim don.

Ka jingngeit biej bad kwah burom:

Ka don sa kawei kba ngi ju mlien ban leh ha ka jingim ka jong ngi bad kata ka dei ka jingngeit biej bad ka jingkwah nam kwah burom ha ka jinglong briew. Bunsien hi ngi ju lap bad shem ïa kum kine ki jait jingjia ha ka jingim jong ngi ki briew ba, lada don mano mano ba ïaroh bad kiba pynkhyllew ïa kaei kaei ha ngi, wat ïa kaba ngim lah ban leh ruh ngi leh kumba ngi lah ban leh. Hynrei, peit thuh ïa ka jingim jong u Jisu ha ka Kospel, Um shym la leh wat tang ïa kawei ruh ka kam kaba u ksuid u phah ïa U ban leh. Kane ka dei ka nuksa kaba u Jisu U ai ha ngi mynta ka sngi ba ngim dei ban shu ngeit ïa kaba ngim dei hok ban ngeit, pynban ngi dei ban pynkhlaiñ ïalade ban im da ka Ktien jong u Blei kaba don ha ka dohnud ka jong ngi bad ngin kren da ki kyntien kiba ai jingim ïa kiba ïohsngew ïa ka.

To ai ba kane ka Aïom Lent kan pynjan shuh shuh ïa ngi ha ka jingïadei ka jong ngi bad u Blei.

Yn ïaroh ïa u Jisu Khrist.

Junom la junom. Amen.