Ïa ka jingpule banyngkong la shim na ka Kitab Eksodus 3:1 – 8a, 13 – 15, ïa ka jingpule ba-ar pat la shim na ka Shithi Banyngkong jong u Paulus Apostol sha ki Korinth 10:1 – 6, 10 – 12. Bad ïa ka Kospel pat la shim na ka Kospel Bakhuid katkum u Lukas 13:1 – 9.
Psalm 103:1 – 2, 3 – 4, 6 – 7, 8 bad 11 (R. 8a).
Ka jingkhot jong u Blei:
Ha ka jingpule banyngkong na ka Kitab Eksodus ngi shem ba u Blei U don ryngkat bad ki briew lajong (ki paid Israel). Wat ha ka por ba ki shah ringmraw sha Ijipt ruh U sngap ïa ka jingud bad ka jingpyrta jong ki sha U.
Kane ka pynkynmaw ïa ngi ruh ba ngi la kylla long ki Khun Blei, ki Khun binong-bishon lyngba jong ka Baptisms Bakhuid. Ngi kham jan sha U ha ki bun ki liang. Bad ha kane ka Aïom Lent, ka por jingaiei jong ka jingmap to ngin ïa phai sha U ban pan buit bad bor ban ïaleh pyrshah ïa ka jingsniew khnang ba ngin dup ïoh bynta pura kum ki Khun baieid eh jong U ha baroh ki liang.
Ka “ding” ba meh ka thew ïa ka jingdon jong u Blei. U Moses u la pyrshang katba lah ban jan sha u Blei ha kaba nyngkong hynrei, u Blei U phah ba u Moses u dei ban pynkhuid shuwa ïalade shuwa ban jan sha ka jaka kaba U don. Kane ka pynkynmaw ïa ngi ba u Blei U long Uba khuid bad ka hikai ruh ïa ngi ba ngi dei ban pynkhuid shuwa ïalade lada ngi dei ban ïatrei ryngkat bad U. Dei ha kane ka Aïom Lent ba U khot ïa ngi kumnba U la khot ïa u Moses ban wan shajan jong U.
Ka jingdon jong u Blei:
Nangta ruh, ka jingpule ba-ar ka ai shuh ha ngi ïa ka jingkyrmen kaba khraw bad kata hi ka long ba ngin don ïa u Blei ha ka jingim jong ngi kaba manla ka sngi khnang ba ka jingshngaiñ kan dei ïa ngi hi.
U “lyoh” ha ka jingpule ba-ar ka thew ïa ka jingdon jong u Blei. Da kaba pule bad pynshong nongrim bha ïa ka jingpule na ka Jingthoh Bakhuid ngin sa sngewthuh kham shai ïa ka jingdon jong u Blei bad ka jingbha kaba mih nangta.
Ngi dei ban husiar ïa la ka jingim ïoh ngi shah ïalam bakla ha kiwei bad khamtam ruh ha ka jingmut jingpyrkhat ka jong ngi bad ka jingkwah jong ka dohnud. Lada ngim husiar ngin sa ngat ha ka apot sepsngi. Kumba ka Jingthoh Bakhuid ka ong, ba kiei kiei baroh kiba la dep jia mynshuwa ki long ki nuksa bad kaei kaba la thoh ka long ka jinghihai na ka bynta ka jong ngi.
Ka jingkhot ban kylla ka bamut:
Ka Kospel ka hikai ïa ngi ba ngim dei ban ñiew ïalade kiba hok lymda ngi kylla ka bamut. Ba kham bunsien hi, ngi ñiew ïalade ba ngi long kiba hok da kaba ñiew ïa kiwei kiba pop lane kiba kham pop ban ïa ngi (indirect consideration).
U Blei U maham ïa ngi ban bishar ïa kiwei bad U kwah pat ba ngin dup kylla ka bamut khnang ba kan pura ka jinglong Khristan bad ka jinglong Khun Blei ka jong ngi.
Ka dkhot balai bad basan ki dei ka jubab jong u Jisu ïa ngi.
“Em! Nga ong ha phi ba lada phim kylla ka bamut, phi baroh phin ïap kumjuh.”
U Blei Un sa bitar ïa ngi lada ngim shah shkor ïa ka jingkhot jong U ban kylla ka bamut. Ka nuksa na u dieng sohdymbur ka long kaba kham shai, ba lymda ngi seisoh ngin sa shah kyntait ha u Blei.
To ai ba kane ka Aïom Lent kan long shisha ka por jingmap bad ka jingpynjanai jong ngi ban phai-dien sha u Blei.
Yn ïaroh ïa u Jisu Khrist.
Junom la junom. Amen.
0 Comments