Ka Por Lent Ba-ar (Second Sunday of Lent)

Ïa ka jingpule banyngkong la shim na ka Kitab Jenesis 15:5 – 12, 17 – 18, ïa ka jingpule ba-ar pat la shim na ka Shithi Banyngkong jong u Paulus Apostol sha ki Philipi 3:17 – 4:1 (3:20 – 4:1). Bad ïa ka Kospel pat la shim na ka Kospel Bakhuid katkum u Lukas 9:28b – 36.

Psalms 27:1, 7 – 8b, 8c – 9abc, 13 – 14 (R. 1a).

Ka Jingngeit bad ka jingpdiang ïa ka:

Ha ka jingpule banyngkong na ka Kitab Jenesis ngi shem ba u Blei U kyrhu kyrdoh ïa u Abraham ha ryngkat ïa ka pateng jong u ki ban sa wan. Kane baroh hi ka dei na ka jingkohnguh sneng jong u Abraham hi kaba la pynsngewbha ïa u Blei bad ba U kular ban pynroi ïa ka jingieid jong U lyngba jong u Abraham bad ki khun ki shiew jong u kiba ha ki pateng ban sa wan. U Abraham u la ngeit ha u Blei Uba im.

Ka jingkylla dur:

U Paulus Apostol u jaw ummat haba u khot u wer ïa ngi sha ka jingim bahok namarba ngim patiaw shisha ban im ha ka lynti jong ka jinghikai ka Balang Bakhuid, namarba bun hi kiba ngeit mynta ki la kylla long pynban ki nongshun jong ka Diengphna! Lyngba jong kane ka Aïom Lent to ngin ïa puson ïa la ka jingim bad ban ïaleh katba lah ban pynsngewbha ïa u Trai kumba la leh da u Abraham ïa kaba ngi shem ha ka Jutang Barim. U Paulus Apostol u, pynknmaw ruh ïa nga ïa phi ba lada ngi pynlut por tang ïa kiei kiei jong kane ka pyrthei ngin sa jot ha ka jingim mynsiem. Wat shah ba ka jingmut jingpyrkhat ka jong ngi kan dap tang da ka jingkwah bad jingsngewbha pyrthei namarba ka jingma ka ap thap ïa ka jingim ka jong ngi.

Nongshong Shnong Ka Bneng:

Kumta ngi dei ban im ka jingim kaba ïadei dur bad ka jinghikai jong ka Balang bad ka Jingthoh Bakhuid kaba long ka Ktien Jong u Blei namarba ngi dei ki nongshong shnong (citizens) jong ka Bneng. Khem pep ngi kmen ban tip bad ban ïohsngew ba ngi dei ki nongshong shnong jong ka Bneng wat lada ngim pat ngeit skhem ne sngewthuh shai shaphang kata ruh. Hynrei ban long kiba dap da ka jingkyrkhu bad ka jingaiei u Blei ngi dei ban ngeit kum u Abraham uba long ruh u Kpa jong ka Jingngeit.

Tip bad sngewthuh shuwa ban kren ne kam:

Kaei kaba ngi ïohsngew ha ka Kospel ka long ba mangi ruh ngi ju mlien ban leh bad kata ka long ba ngim ju lah satia ban duwai kumba long u Petrus bad u Ïoannis. Te u Jisu hi U la pyni ka nuksa kaba bha tam ba ngi baroh ngi dei ban bud. Wat lada U dei U khun jong u Blei hynrei U dang duwai. Katno tam lei lei na ka bynta jong ngi kum ki jingthaw jong U ban leh ïa kata.

Ka bor jong ka jingduwai:

Hadien jong ka jingduwai, u Petrus bad u Ïoannis ki ïohi da la ki jong ki khmat ba u Jisu U tynshaiñ hadien jong ka jingduwai ka jong U. Ym ba ki ruma ïohthiah hynrei ki la kyndit na kaba thiah bad ki sakhi ïa kata. Wat u Jisu ruh U tip ïa kaei kaba la jia bad kaban sa jia ha ka jingim ka jong U namarba U la dep ïoh ïa ka bor na ka jingduwai.

Te to ai ko hynmen ko para ba lyngba jong kine ki jingpule na ka Jingthoh Bakhuid kan btin lynti ïa ngi ba ngin kut jingmut noh ha kane ka Aïom Lent ban duwai bad ban imsngi ha ka.

Yn ïaroh ïa u Jisu Khrist.

Junom la junom. Amen.