Ka Taïew Ba Phra Jong Ka Por Laitïa (Eight Week In Ordinary Time)

Ïa ka jingpule banyngkong la shim na ka Kitab Sirak 27:4 – 7, ïa ka jingpule ba-ar pat la shim na ka Shithi Banyngkong  jong u Paulus Apostol sha ki Korin 15:54 – 58. Bad ïa ka Kospel pat la shim na ka Kospel Bakhuid katkum u Lukas 6:39 – 45.

Psalms 92:2 – 3, 13 – 14, 15 – 16 (R. peit na ka 2a).

Ka jingpule banyngkong ka pynkynmaw ïa ngi ba ngi long kum ei. Ha kaba sdang nga kwah ban pynkynmaw kumne ba, baroh na ngi ngi kwah ban da pyrshang shuwa ïa ka slipar ne juti haba ngi thied na ïew na hat ha shuwa ba ngin thied. Kumta ka jingpyrshang kam long kaba lehnohei. Da kaba ngi leh kumne ngi sngewthuh bad tip kham bha ïa ka mar la ka long kaba bha ne ka bym da bha. Ha kajuh ka rukom ka jingtynjuh kaba wan ha ka longbriew ka jong ngi ka long kum ka kam kaba ngi pyrshang shuwa ban thied ïa kano kano ka tiar, namar ngi bishar shuwa ïa ka. Te lyngba ka jingtynjuh bor ïa ngi kiwei kin sa tip ba ngi long kum ei. Kumjuh ruh lada ngi tynjuh ïa kiwei ngin sa tip ba ki long kumno.

Ka jingtynjuh

Haba shah tynjuh ngi shem ba ka don ka jingshisha kaba ngim lah satia ban buhrieh. Ban ai nuksa: lada pyndom ïano ïano ngi ju lap ïa ka jinglong bashisha ka jong ki; lada ki dei kiba domriang ne ki bym domriang, kiba bha ne kiba sniew jinglong. Kumta kaei kaei baroh ka ring dur hi sha ka shlem pyrkhat ka jong u briew; ba dei tang ha ka jingkren jong u ba ngin sa tip ba u pyrkhat kumno!

Shuh shuh ruh, u Paulus Apostol ha ka shithi banyngkong jong u sha ki nong Korin u ai mynsiem ïa ngi ba ngin im bad ïaid ha ka lynti kaba bha, da kaba ngi aiti ha u Blei ïa la ka jingim bad ki kam ki jam kiba ngi trei.

Ka jingkhwan lalot bad kwah rhah

Kumba ngi baroh hi ngi tip ba ka jingsarong bad ka jingkwah rhah ka ju ïalam ïa ngi sha ka pop bad ka pop ka ïalam ïa ngi sha ka jingïap. Kumta kaba sinew hi ka ïalam ïa ngi sha ka basniew! Bad ka babha ka kan sa ïalam ïa ngi sha ka babha.

Ka Kospel ka kren shai ha ngi shaphang jong u nongïalam. U nongïalam hi bunsien lada u im bha un kit ki jingkyrkhu bad ki jingaiei-blei hynrei, lada u im pat ha ka thok ka shukor bad ha ki kam jakhlia u kham kit pap ma u ban ïa ki nongbud jong u baroh. Te na kata ka daw ban long nongïalam ngi dei ban da pyrkhat janai ïa ka deiti kaba dei ban kitkhlieh.

⁶ “Naba ka shyntur u briew ka kren na ka jingshlei ka dohnud.”

Namar kata, to ngin ïa bishar bha ïa la ka dohnud bad ka rukom prykhat ka jong ngi bad ban aiti ïalade bad ka ïing ka sem ka jong ngi ha ryngkat ki jingthmu bad ki kam ki jong ngi ha u Blei.

Yn ïaroh ïa u Jisu Khrist.