Ka Taïew Ba Hynriew Jong Ka Por Laitïa

Ïa ka jingpule banyngkong la shim na ka Kitab Jeremiïa 17:5 – 8, ïa ka jingpule ba-ar pat la shim na ka Shithi Banyngkong  jong u Paulus Apostol sha ki Korin 15:12, 16 – 20. Bad ïa ka Kospel pat la shim na ka Kospel Bakhuid katkum u Lukas 6:17, 20 – 26.

Psalms 1:1 – 2, 3, 4, 6 (40:5a).

U Blei lyngba jong u Jeremiïa U la kren shai ba ngim dei ban shaniah tylli tang ha u briew; naba ka bor briew kam neh junom bad kam long kaba janai. Kane kam shym mut eh tang ka jingshaniah ka jong ngi ha kiwei pat ki briew, hynrei ka thew ruh ïalade naba bunsien hi ngi im ha ka jingtlot briew. Te ka dei hok ïa ngi ba ngin shaniah beit tylli tyllan tang ha u Blei hi. Naba lada ngin shaniah lut ha U ngin sa long kum u jingthung uba im harud ka wah kaba ai jingim ïa u, bad ngi ruh ngin sa seisoh shibun ha ka jingim.

Shuh shuh ruh, u Paulus Apostol ha ka shithi banyngkong jong u sha ki nong Korin ïathuh ba ka jingkyrmen bad ka jingshaniah ka jong ngi ka dei ha u Blei baim Uba la mihpat na ki baïap. Kumba ka Balang Salonsar (Catholic) hi ka la hikai ïa ngi bad kumba ngi hi ngi la pdiang ïa ka Jingngeit Khristan, ka jingpynim ka jong ngi ka wan na u Blei bad ka jingkyrmen bad ka jingshaniah ka jong ngi ruh ka long tang ha U hi Uba long bad im shaduh bymjukut. Lada ngi dang artatien shaphang kane katta ka mut ba ka long lehnohei ka jingim bad ka jingngieit kaba ngi don.

Ka jingkyrmen kaba khraw ka wan urlong ha ka ktien kaba la kren hi da u Jisu kumba la ïathuh ha ngi da u Lukas mynta ka sngi. To ngin pule biang ïa ka khnang ba ngin dup sngewthuh shai ba aïu u Jisu U pynsngew ha ngi iwei pa iwei. Na ka bynta kiba ngeit ka la long lypa ka jingkyrmen kaba khraw bad na ka bynta kiba artatien bad ki bym ngeit ruh ka la dei ka jinghikai bad ka sakhi ba shisha jong u Blei ba ngin shaniah bad ngeit tang ha U hi mynta bad haduh ka jingim lawei.

Yn ïaroh ïa u Jisu Khrist.

Junom la junom. Amen.