Ka Taiew Ba Hynñiew Jong Ka Por Laitïa (Seventh Week In Ordinary Time)

Ïa ka jingpule banyngkong la shim na Ka Kitab banyngkong jong u Samuel 26:2, 7 – 9, 12 – 13, 22 – 23 ïa ka jingpule ba-ar pat la shim na ka Shithi banyngkong jong u Paulus Apostol sha ki Korin 15:45 – 49. Bad ïa ka Kospel pat la shim na ka Kospel Bakhuid katkum u Lukas 6:27 – 38.

Psalms 103:1 – 2, 3 – 4, 8 bad 10, 12  – 13 (R. 8a).

Na ka jingpule banyngkong ngi ïohi ba u Blei U don ki shakri babha jong U kiba im ïa ka jingim ban pynneh pynsah ïa ka jingbha blei. Kane ka hikai ïa ngi ba nigm dei satia ban long kiba khwan ïa ka bor bad ka burom naba kam long satia kaba bha bad kaba pdiang hun hakhmat jong u Blei bad briew. Mano na ngi ba lait na ka mynsiem sarong? Hato don napdeng jong ngi kiba lah ban long kiba janai baroh shiryta? Em, khlem pep ngim lah shisha ban long kiba kumta ban im tang ha ka jingkhuid mynsiem; dei namar kata ka daw ba lyngba jong kane ka jingpule kaba nyngkong ha kane ka taiew ba la wer ïa ngi ban im ha ka hok jong ka longbriew-manbriew.

Hooid, ngi kubur ba ngim long kiba janai ha ka jingim ka jong ngi ha ki por baroh. Hynrei ka dei ka lyngkor kaba khia kaba ngi hap ban kit ha man la ka khyllipmat jong ka jingim ka jong ngi, kaba sdang shuwa na lade ban im ha ka tip-briew – tip-blei, naba u Blei U sngwtynnat tang ïa kito kiba im bha, kiba ïaid adkar bad kiba tieng burom ia U.

Ka jingpule baar ka pynkynmaw ïa ngi ba ngi dei na ka dewmet ha ka jinglong doh ka jong ngi kaba dap tang da ki jingbympura ha ki bun ki liang. Hynrei, kane baroh kam shym la shu kut noh tang ha ki jingduh jingkyrmen ne ka jingsngew kut lad namar ba u Blei Uba stad naduh bymjukut shaduh bymjukut U la phah ia la u jong u Khun bamarwei jong U, u Jisu Khrist ban pynmihpat ïa ngi baroh na ka jinglong batlot jong ka doh sha ka jingim bathymmai jong ka mynsiem kaba wan hi na U.

Ha ka jingim jong ngi ha ka jinglong doh ngi hap bunsien ha ka pap ka sang kaba la pynsakma ïa ngi na u Blei bad don ruh ki por ba ngi poi haduh u pud ba ngi haduh ba ngi dkhat noh ruh ïalade na ka jingieid jong u Blei ia ngi.

Ka Kospel ka iaiban ïa ngi ba ngi dei ban long ki khun jong ka jingngeit bapura jong u Khrist. Ngi dei ki khun jong ka jingshai bad kumta ka dawa ia ngi ba ngin im ha ka jingshai ym ha ka jingdum jong ka pop bad ka jingbiej. U Blei U thrang dik-dik ba ngin im ha ka hok bad ka jingbha, ban lehbha kat kaba ngi lah-ei. Um shym kwah ba ngin bud ia ka dustur barim ban siew kylliang da ka basniew ia ka basniew hynrei, ba ngin siew da ka babha ïa ka basniew kaba ngi shah na kiwei.

Hato ka don jingmut ba ngin ieid ha pyrthei?

Ban ïohnong ha ka jinglong ka doh te khlem pep ka don ka jingmut ban ieid tang ïa kito kiba ieid ïa ngi, katba haba ngi phai pat katkum ka jinghikai jong ka Kospel te ngim long satia kiba bitdor wat tang ban khmied ïa la ki jong ki khmat sha bneng ruh haba ngi duwai; wat ban khot ‘Kpa’ lane ‘Ko Kpa jong ngi uba ha bneng…’ ruh kan jnang ïa ngi lada ngim shym la im katkum ka jinghikai jong Ka.

Kaei ka kamram kaba long kyrkieh ïa ngi mynta?

Kane kein ka long kaei kaei kaba kham jwat ha ka bynta jong ka jingim jong ngi kum ki khun Khristan ban im ha ka jingshai jong ka Kospel. Hato don napdeng jong ngi kiba lah shisha ban im tang ha ka jingieid ha ka jingiadei jong ngi bad ki hynmen-para kiba na kajuh ka kmie bad u kpa lane bad ki bahaiiing-hasem? Lada don na ngi kiba kumta te to ngin ainguh ia u Blei Uba la pynmanhok ia ngi. Hynrei, lada ym don te, ka por kam dei shuh ban slem ba ngin sdang thymmai noh ïa la ka jingim Khristan ka jong ngi.

Kaei kaba ngi dei ban leh noh khlem ka jingbuhteng?

Kumba ngi kwah ba kiwei kin lehbha ia ngi te mynta ka lah dei ka por kaba biang ba ngin sdang shuwa na lade ha ryngkat ka jingmap ha ki khep ba ngi iakynduh ïa ki tam ki dun ka jinglong briew ka batlot ka jong ngi. Ngim dei ban bishar ïa kiwei naba, ngi ruh ngin ym lait na kata. Ka tarajur jong ka jingim jong ngi ka long kumjuh (parallel/equal) hakhmat jong u Blei.

To ngin ïaleh katba lah ban im ha ka jingshai jong ka Kospel khnang ba ngin dup long ki khun jong u Kpa Uba halor tam.

 

Yn iaroh ia u Jisu Khrist.

Junom la junom. Amen.