Ïa ka jingpule banyngkong la shim na ka Kitab Jingstad 7:7 – 11, ïa ka jingpule ba-ar pat la shim na ka Shithi sha ki Hebru 4:12 – 13. Bad ïa ka Kospel pat la shim na ka Kospel Bakhuid katkum u Markus 10:17 – 30.
Psalms 90:12 – 17.
Na ka jingpule banyngkong ngi shem ba dei tang u ne ka briew ba imsngi ban duwai ki ïoh ïa ka jingaiei-blei ba kham kyrpang. Balei nga ong ba ka long kyrpang? Lada phi tip ïa ka jingim jong u Solomon katkum na ka Kitab Jingstad phin sngewthuh ïa kaba nga thum ban ong shaphang jong ka jingaiei kaba u lah ïoh ha ka liang jong ka jingstad bad ka jingshemphang. Ban ïoh ïa ka jingstad ngi donkam ban da imsngi ban pan na u Blei lyngba jong ki jingduwai.
Kaei ka jingnang bad ka jingstad? Ka jingnang-jingtip ka dei kaei kaei kaba ngi ïoh na ka sawdong kaba ngi im, na ka imlang sahlang bad ruh na ki skul bad ki jaka pule-puthi bapher bapher (ïa kaba la khot Knowledge ha ka ktien nongwei). Katba ka jingstad (Wisdom) pat ka kham khraw ban ïa ka jingnang-jingtip hynrei, ha ka la kynthup lang ïa ki. Ka jingstad hi ka wan na u Blei ym na u briew.
Ka jingpule ba-ar ka pynkynmaw ïa ngi ba ka Ktien jong u Blei ka long kaba donbor bad ka bakhraw haduh katta katta. Lada ngi duwai khlem da sngewthuh bad shemphang ïa ka Ktien jong U ruh kata kam long kaba pura. Ban duwai hapdeng ka jingarsap bad ka jingthmu ba kwah rhah kata ruh kam long kaba pdiang hun hakhmat jong u Blei. Namar kata, ngi donkam ruh ban imsngi ban pule ïa ka Ktien jong u Blei ba dei lyngba jong Ka ki jingduwai jong ngi ruh ki long kiba kham kit jingmut hakhmat jong U.
Ka Kospel ka nang kham pynjanai shuh shuh halor kitei ki mat ba la kdew haneng. Ka jingim jong ngi ruh kam long kaba pura lada ngi shu bud tang ïa ki jinghikai lane ki aiñ bapher bapher jong ka Balang, namar ngi ngim tip ïoh lehse ngi long pat kiba sarong bad kiba don ka jingduna bad ki jingthut bapher bapher ha ka jingim ba man la ka sngi wat hapdeng ba ngi la bud pyrkhing lehse ïa ki aiñ bad ki jinghikai jong ka Balang. Dei halor kata ka nongrim ba ngi dei ban imsngi ban pule bad da sngewthuh shai ïa ka Ktien jong u Blei namar Ka hi ka kham nep ban ïa ka waitlam arliang syrti ban bsut ha ka donhud ka mynsiem jong ngi ban mait noh ïa ki kynjri jong ka pap ka sang kiba la teh la khum ïa ngi kum ki mraw khlem ka jinglaitluid.
Ngi donkam ban long kiba sngewrit kum u Solomon ban imsngi ban pan na u Blei ïa ka jingstad, ka jingstad ban sngewthuh ïa ka Ktien jong U bad ban leh ïa ka mon jong U. Ban leh ïa ka mon jong U ka long ruh ba ngin sngewlem ïa la u paramarjan kumba U hi U la hikai ïa ngi ba ngi dei ban ieid ïa la u paramarjan. Da kaba ngi pyndem ïalade hakhamt jong u Blei bad ban long kiba sngewrit, kiba ieid bad ïai map markylliang ngin sa lah ban ïoh bynta ha ka jingsuk jong ka jingim lawei ha ka akher ka sngi.
Yn ïaroh ïa u Jisu Khrist.
Junom la junom. Amen.
0 Comments