Ïa ka jingpule banyngkong la shim na ka Kitab Jenesis18 – 24, ïa ka jingpule ba-ar pat la shim na ka Shithi sha ki Hebru 2:9 – 11 bad ïa ka Kospel la shim na ka Kospel katkum u Markus 10:2 – 16.
Psalms: 128:1 – 6.
Na ka jingpule banyngkong mynta ka sngi ngi shem ba u Blei U lah ban leh bun kiei kiei kiba bha ha ka jingim jong u briew. U tip bad sngewthuh ïa ka jingdonkam jong u briew wat ha shwa ba u briew un sngewthuh bad sngewdonkam.
U Blei U la kyrkhu ïa ka longïing longsem kaba thymmai bad kaba nyngkong eh jong u khunbynriew hangne ha sla pyrthei.
Ha ka jingpule ba-ar ngi shem ba u Blei U kwah ba mangi baroh ngi dei ban long kiba sngewrit bad kiba pynhapoh ïalade khnang ban lait na ki jinglong basniew bad khamtam ban dup khraw ka jingieid ïa U. Te namar kata, ka dei ban don ka jingpynhapoh ïalade hakhmat jong kiwei pat, kam pher la ngi khraw ka kyrdan, ngi biang ka jingdon jingem bad kumta ter ter.
Shuh shuh kaba kham sngewtynnat ka long ba u Blei U kwah ba ka jingsngewrit, bad ka jingpynhapoh iwei ïa iwei pat bad ka jingïaburom markylliang ba kan don ha ki longïing longsem Khristan.
Haba ngi phai pat sha ka Kospel ngi shem ba u Blei U bitar lada ngi leh palat bad pynkheiñ aiñ. Ka jingleh jong u Moses ka long ba ki briew kim sngewthuh shuh ïa ka jingkordor jong ka shongkha shongman. Nalor kata ruh kaba kham sngewsih shuh shuh ka long ba kim tieng burom shuh ïa u Blei; ki shim ïa ka aiñ Blei ha kti lajong ban thaw thymmai hi dalade.
“Te na kane ka daw u briew un ïeh noh ïa la u kpa bad ïa la ka kmie, bad un ïasoh bad la ka tnga, bad ki ar ngut kin long kawei.’ Kumta kim long shuh ar, hynrei kawei.” 7 – 8
Haba lum lang ïa baroh lai tylli ki jingpule ngi sngewthuh shai ba naduh kaba sdang kulong kumah hi u Blei U la kyrkhu kyrdoh ïa ka longïing longsem ha kaba U hi dalade U la pynkong pynman ïa ka. U kwah ruh ba ha ka, yn don ka jingpynhapoh markylliang, ka jingsngewrit bad ka jingïaburom ïa u Blei, ïa kane baroh U la pyni nuksa da ka jingim jong u Khun jong U hi, u Jisu Khrist. Shuh shuh ban pynkynmaw, ba ka jingklim lane ban klim ka dei ka pop bakhraw tam hakhmat jong u briew u Blei.
“U briew uba pyllait ïa la ka tnga bad u shim tnga da kawei pat ka kynthei, u klim ïa ka tnga lajong. Ha kajuh ka rukom, ka kynthei kaba pyllait ïa la u tnga bad ka shim tnga da uwei pat u briew, ka klim.” 11 – 12
Phi tip ïa ki hukum: “Wat pynïap; wat klim, wat tuh; wat lamler; wat leh klop; burom ïa la u kpa bad ïa la ka kmie.” 19
“...Te u briew um dei ban pynkhlad ïa kaba u Blei U la pynïasoh lang.” 9
Yn ïaroh ïa u Jisu Khrist. Junom la junom. Amen.
){kind=link}
0 Comments