Ïa ka jingpule banyngkong la shim na ka Kitab Jingkheiñ 11:25 – 29, ïa ka jingpule ba-ar pat la shim na ka Shithi jong u Jakob 5:1 – 6 bad ïa ka Kospel la shim na ka Kospel katkum u Markus 9:38 – 43, 47 – 48.
Psalms: 19:8, 10, 12 – 14.
Na ka jingpule banyngkong mynta ka sngi ngi shem ba u Moses u long u ksiang hapdeng jong u briew bad u Blei. U ïasaid na ka por sha ka por ban wanrah jingsuk ïa ki paid babun (hynriew spah hajar ngut) namar ka jingthngan kaba la ban ïa ki. Kaba sngewtynnat ka long ba u Blei Um shym la iehnoh ïa ki khlem ka jingpeit jingkhmih jong U lane khlem u nongïalam bad u nongïasaid hapdeng jong ki bad U. hynrei, kaba sngewsih pat ka long ba ki briew hi kim sngewthuh ïa ka jingdon ka jong u Blei bad ki. Ki la thnum namar ka bam ba kim ïa ban bam ban dih bha, ki la kwah da ka doh ban bam kdang. Kata kam shym mut ba u Blei U la lyndet na ki, hynrei U la bsa ïa ki da ki da u manna ba long kum u symbai dhania, bad ka rukom long kum u bdellium. 7 – 8.
Hadien ba u Moses u lah dep ban jied ïa ki hynñiewphew ngut ki tymmen ki san, u Trai u la wanhiar ha ka dur jong u lyoh bad u la kren ha u. Nangta U la shim ïa ka mynsiem jingbha, jingïatiplem bad khamtam ka mynsiem tieng bad burom Blei na u Moses bad sam lem ha ki hynñiewphew ngut kita ki riew rangbah ba la jied.
Don pat arngut ki ba la shah jied u Eldad bad u Medad, hynrei kim treh ban wan bad ban ïadon lang ha kata ka ïing jaiñ bad u Moses, hynrei ïa ki ruh u Blei U la ai lang ïa kata ka bhah kumba la ai ha kiwei pat. Te kumta ki la sdang ban sngewthuh shai ïa kiei kiei baroh bad ki la ïathuh lypa ha ka jaka dara kaba ki don.
Ko para bangeit baieid baroh, to ngin bishar bniah ïa ka jinglong Khristan bashisha ka jong ngi, hato ngi la shaniah tylli ne em ha u Blei? Ne ngi la kylla long pynban ki nongshun jong U? Balei nga ong ïa kane, ka daw ka long ba la don ki briew kiba la thnum bad kiba la bishni ïa kitei ki arngut kiba la ïathuh lypa ha ka ïing dara! Kim shym la treh ban ïadon bynta lang bad u Moses ha ryngkat kita kiwei pat kiba la shah jied hynrei kumno ki lah ban ïathuh lypa?
Ka jingpule ka ba-ar ka maham ïa kiba riewspah, kiba leh sahuh, kiba pynksan ïalade, kiba kwah rhah, kiba bishni – pihuiñ, kiba khwan lalot – khwan myntoi shimet, kiba bam klop bad kum kine ki jait jinglong basniew. Namar kum kine ki jait briew ki pynïap ïa u baduk – barangli, u sem shiliang u kup shiliang.
Ka Kospel Bakhuid pat ka pynpura ïa ka jingieid ka jong u Blei ïa ngi. Naba u Blei Um shym la long Uba bishni – pihuiñ bad Um ju kwah hi ruh ba mano mano napdeng jong ngi ba ngin long kiba kumta. Ha u Blei hi ka jingim babha ka dei kaba U da pdiang hun bad peit sngewbha. Te lada don mano mano kiba leh bha bad im bha khamtam lada ki leh ïa kano kano ka kam kaba bha ha ka Kyrteng jong U, wat lada um don ha kajuh ka kynhun ruh u Blei Um ju kyntait ïa kum uta u jait briew na ka jingieid ka jong U.
Lyngba jong kine baroh lai tylli ki jingpule ngi sngewthuh mynta ba u Blei U kwah ïa ngi ba ngin ieid hok bad shaniah hok tylli tyllan tang ha U wat ha ka por kaba ngi sngew kut lad. U kwah ba ngin im ha ka jingshisha bad ban kiar na na jinglong basniew kum ka bishni – pihuiñ, kwah rhah, khwan myntoi, bam klop bad kiwei de kiba lah dep batai hashuwa jong kane ka dkhot. Bad to ai ba ka jingieid sbun jong U kan ïai pynkynmaw ïa ngi ha man la ka khyllipmat jong ka jingim jong ngi ban bud ïa ki jinghikai jong U.
Yn ïaroh ïa u Jisu Khrist. Junom la junom. Amen.
){kind=link}
0 Comments