Ka Taïew Paskha Ba-ar (Ka Sngi Jingisynei Jingblei)

Ïa ka jingpule banyngkong la shim na Ki Kam Jong Ki Apostol 4:32 – 35, ïa ka jingpule baar pat la shim na ka Shithi banyngkong jong u Ïoanis 5:1 – 6. Bad ïa ka Kospel pat la shim na ka Kospel Bakhuid katkum u Ïoanis 20:19 – 31.

Psalms 118:2 – 4, 13 – 15, 22 – 24.

Hadien jong ka Paskha (Ka sngi jingmihpat ka jong u Trai) ka Balang ka rakhe ïa kane ka sngi ka sngi jingisynei jong u Blei ïa kaba la tip ruh kum ka Divine Mercy Sunday.

Te ka jingpule kaba nyngkong ka ïathuh ha ngi shaphang ka jingïatylli jong ki nongbud jong u Jisu kiba la sakhi ïa ka jingshisha jong ka jingmihpat ka jong u ha ka Burom. Ki lah don tang kajuh ka jingngeit bad kawei ka mynsiem. Kim shym la kwah rhah lane ban khwan lade ïa kaei kaei baroh kaba ki ïoh ha ka jingim ka jong ki. Wat ïa kaba ki don bad kaba dei hok hi ka jong ki ruh, ki die sha kiwei bad ki sam ruh de ïa ka jingmih na kaba ki die ïa ki sha kito kiba donkam. Kumta la khot la wer ruh ïa ngi iwei pa iwei ba ngin long kum ma ki ha ka jingïatylli na ka bynta ka jingbha bad ruh ban don tang ka mynsiem jong ka jingieid ïa ki para briew kiba donkam ka jingïarap ka jong ngi.

Don bun ki briew kiba donkam ïa ka kti kamon kti kadiang ka jong ngi ha ka imlang sahlang hynrei, ha ki por jong ka jingbunkam bad kiwei de ki khep lehse ngi la kum ibeiñ bad leh bym suidñiew ïa ki; te kumta kane kane ka long ka lad ïa kaba ngi donkam ban pynbeit noh ïa la ka jingim kum ki khun Khristan bashisha bad im ha ka jingmut babha na ka bynta jong u Khrist Jisu.

Shuh shuh ka jingpule ka ba-ar ka ïeng nongrim halor kane ba, lada ngi ngeit shisha ïa u Jisu Khrist uba la mihpat na ki baïap te ïa ngi yn ñiew ba ngi long ki khun jong u Blei bad ruh lada ngi ieid shisha ïa u Blei u Kpa kaba mut ba ngi ieid ruh ïa u khun bamarwei u jong U. Dei halor kata ka nongrim ba ngi tip ba ngi long ki jong u Blei haba ngi ieid ïa U bad kohnguh ïa ki Hukum ki jong U. Da ka jingngeit ka jong ngi ngin jop ïa ka pyrthei bad kan thom lin ïa ka.

Ka Kospel ka pynkynmaw ïa ngi ba u Jisu U ai bad wanrah jingsuk jingsaiñ ïa ngi sha kane ka pyrthei. Ïa kata baroh phin shem na ka Kospel katkum u Ïoanis ba hadien jong ka Paskha kata ha ka sngi nyngkong jong ka taïew ba u Jisu U wan ban ai ïa ka khubor jong ka jingsuk ha ka pyrthei ïa kaba U la pynpaw ha ki synran ki jong U.

Ka khubor jong ka jingsuk jong u Khrist ka don ruh ïa ka kam mishon (Mission) ban pynphriang ïa ka sha kylleng sawdong jong ka pyrthei, namar kane ka long ka jingangnud ka jong u Blei hi.

²¹ “Ka  jingsuk ha phi! Kumba u Kpa U la phah ïa Nga, Nga ruh Nga phah ïa phi.”

Ïa kata baroh hi U da pynskhem ruh ïa ka jingngeit ka jong ki da kaba U pyrsad halor jong ki synrang ki jong U ïa u Mynsiem Bakhuid jong u Blei. Bad ruh ki ïoh ïa ka bor ban map pop (pap) hapdeng jong ki para briew.

²² “To pdiang ïa u Mynsiem Bakhuid. Ïa ki pop jongno jongno ba phi map la map ïa ki; ïa ki pop jongno jongno ba phi pynsah, la pynsah.”

Nalor jong kane baroh, u Jisu U la pynpeit ruh ïa ki khmat kiba artatien ïa kaba U la ong ha u Thomas

²⁷ “Bsuh ïa ka shympriah kti jong phi hangne, bad peit ïa ki kti jong Nga; nangta kher ïa la ki kti bad to twad ïa ka krung jong Nga. Wat artatien shuh, bad to ngeit!”

²⁹ “… Suk kito kibym shym la ïohi, hynrei ki la ngeit.”

Ko hynmen ko para bangeit baroh, ai ba ka Ktien jong u Blei kan pynskhem shuh shuh ïa ka jingngeit kaba ngi lah ïohpdiang bad ba ngin nang pynseisoh ruh ïa ka ha ka mishon (Mission) jong ngi kaba man la ka sngi lyngba ka jingim jingkam bad ka rukom kren-khana ka jong ngi.

Yn ïaroh ïa u Jisu Khrist, junom la junom. Amen.