Ka Taiew Ba Saw Jong Ka Paskha (Fourth Week Of Easter)

Ïa ka jingpule banyngkong la shim na Ki Kam Jong Ki Apostol 4:8 – 12, ïa ka jingpule ba-ar pat la shim na ka Shithi banyngkong jong u Ïoannis 3:1 – 2. Bad ïa ka Kospel pat la shim na ka Kospel Bakhuid katkum u Ïoannis 10:11 – 18.

Psalms 118:1, 8 – 9, 21 – 23.

Ka jingpule ba nyngkong mynta ka sngi pynkynmaw ym tang ïa ki Apostol hynrei, ka pynkynmaw lang ïa ngi ruh shaphang ki kambah kiba u Jisu U la leh ha ki ba pang ba shitom, ha kaba U la pynkoit ïa ki na ki jingpang-jingshitom ki jong ki.

Ba dei hadien ba ki Apostol ki la leit ban ïalap ïa ka jingmihpat jong u Jisu na ki baïap kaba la pynlong ïa ki rangbah lyngdoh ba kin kem bad set byndi ïa u Petrus bad u Ïoannis. Namar ba ki lyngdoh rangbah ki lah dom bad bitar bha ïa kine arngut. Ynda la tian bishar ïa ki ha ka step kaba bud, ki rangbah lyngdoh bad ki stad aiñ ki la kylli ïa ki ba hoto ki leh ïa kum kita ki kam ban ïalap da ka bor jongno bad ha ka kyrteng jongno? U Petrus, uba la dap da ka bor jong u Mynsiem Bakhuid u la jubab ïa ki ba baroh hi ka dei ha ka kyrteng jong u Jisu Khrist ïa Uba ki paid Israel ki la sahnarphna bad ïa Uba u Blei U la pynmihpat na ki baïap bad ruh da ka kyrteng jong U (Jisu Khrist na Nazareth) uta uba la koit u don hakhmat jong ki baroh u ïeng ban sakhi ïa ka jingshisha.

Kumta la pynksan hok ïa ka jingshisha da ka ktien bad ki kam ba ym don kiwei pat ki kyrteng hapoh jong ka bneng bad ha sla pyrthei kiba kham khrawbor ban ïa ka kyrteng jong u Jius Khrist.

Ka jingpule ba-ar ka ai jingkmen ïa ngi haba ka pynkynmaw biang ïa ngi ba ngi long ki khun baieid jong u Blei. Da ka jingïap bad ka jingmihpat ka jong u Trai jong ngi u Jisu Khrist, la pynmanbha bad siewspah ïa ngi da ka snam bakordor ka jong U, ha kaba U la saitkhuid ïa ngi na ka pap ka sang bad na ka raibi ba teh jong u menbarim bad U la pynlong ïa ngi ki khunblei, ki khun binong-bishon.

Ka ïathuh ruh ha ngi ba kum ki khun Khristan, ngi shah ñiewbeiñ bad ka pyrthei ka ïohi pynban ïa ngi kum kiba im khlem Blei! Phewse, wat artatien bad wat duh jingkyrmen naba ka pyrthei hi kam ithuh ïa u Blei! Dei na kata ka daw ba haba kam ithuh ïa U te, kumno kan ithuh ïa ngi?

Mynta ngi la kylla long ki khun jong u Blei lyngba jong ka Baptisma Bakhuid; ïa kaei kaba kham khraw hadien ym pat pynpaw satia hynrei, ngi tip pat ba ynda u Khrist Un wan paw, ngin sa long kum ma U bad hangta ngin sa ïohi shynna ïa U kumba U long.

Ka Kospel ka pynjanai ïa kaei kaba ngi shem ha ki jingpule ba hashuwa. Kumta ka pynskhem ïa ka jingkyrmen ka jong ngi ha kaba ngi ïohsngew ba u Jisu hi U long U nongap langbrot babha. Baroh hi kaba la dep ban jia ka dei ka jingpynurlong ïa ka Jingthoh Bakhuid ban siewspah ïa ngi ki nongpop.

¹⁸ “Ym don ba shim noh ïa ka jingim na Nga: Nga aiti ïa ka da ka mon lajong. Nga don hok ban pha ïa ka, bad Nga don bor ruh ban ïoh biang ïa ka. Kane ka hokum ba Nga la ïoh na u Kpa jong Nga.”

Mynta ka shong pat sa tang ha ngi ba ngin puson ïa la ka jingim bad ba ngin sngewthuh ïa ka bor bamaïan jong u Blei ba ka treikam ha ka jingim ka jong ngi. Ba ma ngi ngi long ki khun jong u Blei te, to mynta ngin imsngi ban duwai ban minot ban pule ïa ka Jingthoh Bakhuid bad khamtam ba ngin long ki atiar babha jong u Blei ha ki hynmen-para jong ngi baroh.

Yn ïaroh ïa u Jisu Khrist, junom la junom. Amen.