Ka Taiew Ba San Jong Ka Paskha (Fifth Week Of Easter)

Ïa ka jingpule banyngkong la shim na Ki Kam Jong Ki Apostol 9:26 – 31, ïa ka jingpule ba-ar pat la shim na ka Shithi banyngkong jong u Ïoannis 3:18 – 24. Bad ïa ka Kospel pat la shim na ka Kospel Bakhuid katkum u Ïoannis 15:1 – 8.

Psalms 22:26 – 28, 30 – 32 (26a).

Ka jingpule ba nyngkong mynta ka sngi ïa ka jingïaid lynti ba shitom jong u Saulus hadien ba u la shem ïa u Trai. Katkum ka jingpule ngi shem ba, u la kwah eh ban ïadon lang bad ki apostol hynrei ki kyntait ïa u namarba, ki la dep tip shaphang ki kam jong ka jingim barim ka jong u. Te kumta ka dei hok ïa ki ba kim kwah ba un ïadon bynta lang bad ka kynhun jong ki.

Haba ngi phai pat sha ka jingtrei borbah ka jong u Blei ka long kaei kaei kaba ngim lah satia ban mutdur! Namar u Blei hi U lah ban pynphai pat ïa uno uno ne ïa kano kano ba la sakma ka jingim. Baroh ka kam babha hi ka wan tat ynda ngi la lah ban ïadon bynta bad ïasoh lang bad u Trai jong ka jingshisha bad ka hok. Kumba u tnat dieng u seilung bad ïoh jingim na u metbah te, kumta ruh ngi dei bah shaniah bad ïaisah ha u Khrist.

U Saulus, kumba u la dep ban ithuh ïa u Khrist, u la sdang ban leh ïa ki kam ki babha khamtam ha ka ban ïalap ïa Kospel jong u Trai.

²⁷ “…kumno u Saulus u la ïalap da ka jingshlur ha ka kyrteng u Jisu ha Damaskus.”

Ka jingpule ba-ar ka kyntu ïa ngi ba ngi dei ban khraw ki kam ban ïa ka ktien kaba ngi kren khnang ba kan dup long ka sakhi ba shisha bad kaba ïaineh ha ki pateng ban sa wan.

¹⁸ “Ko khun ba-ieid, to ngin ïa-ieid ym tang da ka ktien bad u thylliej, hynrei da ka kam bad ha ka jingshisha…”

Wat shah ba ka ktien bad ka jingstad nia ka jong ngi ba kan pyrto ïa ngi hashuwa jong ka kam khnang ba ngin dup lait na ka jinglehraiñ briew. Kumjuh ruh u Jisu hi u kwah ba ngi dei ban pynkhraw ïa ka jinglehbha bad ki kam jong ngi da ka kam bad ym tang da ka ktien kumba la ïathuh ha ngi da u Ïoannis.

Ngi dei ruh ban kynmaw ba ngi dei ban leh ïa kiei kiei baroh da ka jingïatiplem. Lada ngi sngap ïa ka bor jingïatiplem ka mut ba ngi don ha ka liang ka jong u Blei. Hynrei, lada ngi ïaid tam pat na ka kata ka mut ba ngi leh tang da ka jingstad briew batlot ka jong ngi. Te namar kata, to ngin sngapthuh bad da puson bha lada ki kam bad ka ktien kaba ngi kren ki ïadei-dur ne em bad ka jingïatiplem ka jong ngi. Lada ka ktien bad ka kam ka jong ngi ka ïaid ryngkat bad ka bor jingïatiplem ka mut ba ngin sa ïoh pdiang ïa kaei kaba ngi pan na u Blei lyngba jong u Khun jong U u Jisu Khrist.

²³ “Kine ka long ka hukum ka jong U: ban ngeit ha ka kyrteng jong u Khun jong U, u Jisu Khrist, bad ban ieid markylliang kumba U la hukum ïa ngi. ²⁴ Baroh kiba rakhe ïa ki hokum jong U ki ïaisah ha u Blei, u Blei pat ha ki. Ngi tip ba u Blei U ïaisah ha ngi na u Mynsiem ïa Uba U la ai ha ngi.”

Ka Kospel ka pynjanai ïa kata ka jingïaisah jong u Blei. Ka jingïaisah ka jong ngi ruh bad u Blei ka dei kawei ka bor kaba khlaiñ tam ban ïaleh pyrshah ïa u nongshun mynsiem jong ngi. Kumba u tnat dieng waiñ u ïaisah bad la u metbah ban ïoh jingim, kumta ngi ruh ngi dei ban ïaisah bad u Jisu Khrist khang ba ngin dup ïoh jingim kaba pura.

Ka bor bakhlaiñ bad ka spah bymjukut kan wan tang lada ngi lah shisha ban ïaisah bad u Jisu.

Yn ïaroh ïa u Jisu Khrist, junom la junom. Amen.