Ka Taiew Ba-ar Jong Ka Paskha (Second Week Of Easter)

Ïa ka jingpule banyngkong la shim na Ki Kam Jong Ki Apostol 3:13 – 15, 17 – 19 ïa ka jingpule ba-ar pat la shim na ka Shithi banyngkong jong u Ïoanis 2:1 – 5a. Bad ïa ka Kospel pat la shim na ka Kospel Bakhuid katkum u Lukas 24:35 – 48.

Psalms 4:2, 4, 7 – 9.

Ka jingpule ba nyngkong mynta ka sngi ka khot ka wer ïa ngi baroh ba ngin kylla kabamut khnang ban gin dup ïoh ïa ka jingpynim na u Blei. Dei namar jong ka pap ka sang jong ngi hi ba ngi la ñiewbeiñ ïa u Trai jong ngi u Jisu Khrist, kumba la jia ha ka por mynba u dang don ha kane ka sla pyrthei kum u briew ïa kaba la aiti ïa U, sha ki nongsynshar ban bishar bad ban pynrem bymhok ïa U.

Bunsien hi ha ka jinglong briew, ngi ju ñiewkor tang ïa kiei kiei kiba pynsngewbha ïa ka doh bad ka jinglongtlot ka jong ngi bad ba ngi kyntait ïa kaba bha tam. Te nammarkata ïa ngi la khot ban kylla kabamut bad ban phai sha u Blei khang ban gin dup ïoh ïa ka jingpynim bapura.

¹⁹ “To kylla ka bamut, namarkata, bad to phai sha u Blei, khang ba Un dup ñiad noh ïa ki pop jong phi.”

Ha ka jingpule kaba ar la pynkynmaw bad kyntu jur da u Ïoanis ba ngim dei ban im thala bad ban kiar na ka pap ka sang. Shikyntien ban ong, ngim bit ban leh pop! Hynrei lada jia ba mano mano napdeng jong ngi ngi shem ba ngim long kiba bitdor hakhmat jong u Blei ngi dei ban sngewshngaiñ ba ngi don ïa u Nongïasaid jong ngi u Jisu Khrist. La pynkynmaw ruh ba lada ngi ithuh bad ngiet ïa U, ngi dei ban kohnguh bad ñiewkor ïa ki Hukum jong U. Lada ngi kam ïalade ba ngi ieid bad ithuh ïa U bad ngim kheiñkor pat ïa ki Hukum ki jong U te ngi long kiba lamler.

Ka jingieid jong u Blei kan pura ha ngi tang lada ngi lah ban ri kyndong ïa ka Ktien jong U.

Ka Kospel ka wanrah ïa ka khubor jong ka jingsuk ïa kaba u Jisu hi dalade u la tyrwa sbun bad aiei ïa ka jingsuk jong ka Hima Bneng.

³⁶ “Ka jingsuk ha phi!”

Hadien jong ka Sngi Paskha, ngi shem bad ngi lap khah khah ïa ka jingtrywa jingsuk jong u Jisu. Ki synran jong U kim sngewthuh shai ïa ka jingsuk kaba U la tyrwa ha ki bad kaba sngewtynnat pat ban tip ka long ba, U la pynpeiphang ïa ka bor pyrkhat jong ki baroh; bad la weng ruh ïa ka jingartatien ka jong ki.

Kumta u la pynkynmaw biang ïa ki por ha shuwa ka jingshah shitom bad ka jingïap ka jong U halor ka diengphna ha u lum Kalbari ba U ju ïabam lang  ba ki. Hangne keiñ ngi shem ba u Jisu U pynrit ïalade ha ngi iwei pa iwei bad ba U kwah ban shongsah lang bad ngi. Kane ka ïalam ïa ngi sha ka jingmaïa jong ka Ïukharist Bakhuid ba u Blei U pynrit ïalade ha ka dur ba lieh jong u Kpu khlem thiat. Hato ngi kloi ne em ban pdiang ïa U ba Un shongsah bad ngi?

Da kaba kynmaw ïa ki kyntien jong u Paulus Apostol kaba ong:

“Lada u Blei U long ha ka liang ka jong ngi, mano ban ïapyrshah ïa ngi?” (Roman 8:31).

Ko hynmen-para baieid baroh, to ngin kynmaw ban im hok bad ban kiar na ka jingleh pop. Ïa kata baroh ngin sa lah ban leh tang lada ngi pdiang ïa u Jisu ba Un shongsah ryngkat bad ngi.

Yn ïaroh ïa u Jisu Khrist, junom la junom. Amen.