Ïa ka jingpule banyngkong la shim na ka Kitab ba-ar Jong ka Jingthoh Kynmaw 36:14 – 16, 19 – 23, ïa ka jingpule ba-ar pat la shim na ka Shithi u Paulus Apostol sha ki Ephesus 2:4 – 10. Bad ïa ka Kospel pat la shim na ka Kospel Bakhuid katkum u Ïoannis 3:14 – 21.
Psalms 137:8 – 1-2,3,4-5,6-7 (6ab).
Ka jingpule banyngkong mynta ka sngi ka bteng ban hikai ïa ngi shaphang ka jingkordor jong ka Ïingmane kaba long ruh ka ïingkhuid-ïingkyntang ha kaba ngi mane Blei. Naduh ki por hyndai la ñiewburom bad kheiñ kyntang ïa ka. Kiba tamsneng bad kiba lehmon ki ngat ha ka jingbitar jong u Blei.
Ka jingbymsuidñiew jong ki briew ïa ka ïing jong u Blei ka nang pynbitar shla ïa U.
14 “Baroh ki lyngdoh ba kham rangbah bad ki paidbah ruh kumjuh ki la leh bymkohnguh shikatdei eh, da kaba bud ïa ki kam khlemraiñ jong kiwei pat ki jait bynriew. Ki la pynjyrsieh ïa ka Tempyl kaba u Trai U la pynkyntang ïa lade ha Jerusalem.”
Nalor kata ruh lada don kiba sneng ba kyntu pat ruh ki briew ki bym kohnguh ki beiñ ki khoh bad ki im ha la ka mon. Bad kaba kut hi ki dei ka jingbitar jong u Blei.
Ka jingpule ba-ar ka wanlam ïa ka jingkyrmen lyngba jong u Khrist Jisu. Ba ka ïadei dur bha haba ngi don ha kane ka Aïom Lent.
4 “Hynrei u Blei U long Uba kynrei ka jingisynei. Ba U ieid shibun eh ïa ngi,”
5 “U la pynim ïa ngi da u Khrist haba ngi la ïap ha ka pop. (Da ka jingaiei la pynim ïa ngi !)”
Te, ka shong pat ha ngi hato ngi sngewthuh janai bad ngi ngeit skhem ne em ïa ka jinglong Khristan bashisha ha ryngkat ka jingieid bad ka jingisynei jong u Blei.
Shuh shuh ngi shem ha ka Kospel Bakhuid katkum u Ïoannis ba, ka jingngeit ka jong ngi ïa u Blei ka dei ban long kaba hakhmat eh haba ïanujor bad bun kiei kiei kiba ker tawiar ïa ngi.
14 “Kumba u Moses u la kyntiew ïa u ’seiñrnong ha ri kynjah, kumta ruh ïa u Khun u Briew dei ban kyntiew,”
15 “ba baroh uba ngeit ha U un ïoh ka jingim bymjukut.”
Dei namar ka jingieid jong u Blei ïa ngi ba la pynlong ïa ngi ban im hapdeng ki jingkyrkhu bad ki jingaiei bakhraw lyngba jong u Khun bamarwei jong U, u Khrist Jisu.
16 “Hooid, u Blei U la ieid katta katta ïa ka pyrthei ba U la aiti noh ïa la u Khun bamarwei, ba baroh uba ngeit ha U un ym ïap hynrei un ïoh ka jingim bymjukut.”
17 “U Blei Um shym la phah ïa la u Khun sha ka pyrthei ban pynrem ïa ka, hynrei ban long u Nongpynim jong ka.”
Hynrei, kiba ngeit ki ïoh ïa ka jingkyrmen bad ka jingieid jong u Blei, katba ki bym ngeit pat la lah pynrem lypa kumba la thoh:
18 ““Ïa uta uba ngeit ha u Khun yn ym bishar; ïa u kynja bymngeit la lah pynrem lypa, namar um shym la ngeit ha u Khun bamarwei jong u Blei. …”
Ïa ngi la wer ban im ha ka jingshai jong u Khrist Jisu. Ngim dei shuh ban long ki mraw ha ka pap ka sang.
19 “Kata ka jingbishar ka long kumne: Ka jingshai ka la wan ha ka pyrthei, hynrei ki briew ki kham ieid ïa ka jingdum ban ïa ka jingshai, namarba ki leh ïa ki kam sniew.”
Te to ai ko parabangeit baroh ba ka jingngeit ka jong ngi kan btin lynti ïa ngi ba ngin im ha ka jingshai jong u Khrist Jisu ha baroh shilynter jong ka jingim jong ngi kum ki khun Khristan bashisha.
Yn ïaroh ïa u Jisu Khrist.
Junom la junom. Amen.
){kind=link}
0 Comments