Ka Taiew Lait-ïa Ba Arphew-saw (Twenty-fourth Sunday In Ordinary Time)

 Ki Jingpule:

Banyngkong – Sirak 27:30 – 28:7

Psalms – 103:1 – 4, 9 – 12

Ba-ar – Roman 14: 7 – 9 

Kospel – Mattheus 18:21 – 35

 

Ka jingpule banyngkong mynta ka sngi ka hikai ïa ngi shaphang ka jingim jong ka jingmap. Namarba bunsien hi kum ki briew ngim ju lah satia ban map ïano ïano kiba lah pynmong ïa ngi na ki daw bapher bapher. Hynrei u Blei pat Um kwah satia ba ngin buhnud ïano ïano katba mangi ruh ngi dang dei tang ki nongpop.

 

“Ka jingbitar bad ka jingdom ki long ki ba-isaitmet, bad ki snoh rynjaiñ ïa u nongpop.” (Sirak27:30).

U Sirak u hikai ruh ïa ngi ba ngim dei satia ban pynhiar kput ïano ïano naba u Blei Um lah ban map lada ngi leh kumta. Ngi baroh ngi dei tang ki jingthaw bad ka jingkut kan dei ha ka khyndew ha kawei ka sngi te, balei ngin leh ïa ki kam kiba pynbitar shla ïa u Blei. Ngi dei ban im katkum ki Hukum kiba ngi la ïoh na ka Balang Bakhuid jong U. Lada ngi lah ban kiar na ki kam kiba sniew bad kibym wanrah jingmyntoi kata kan pynduna ïa ka pap ka sang ka jong ngi.

Ka jingpule ka ba-ar pat ka pynkynmaw ïa ngi ba lada ngi im ne ngi ïap ngi dei ki jong u Trai. Ym don mano mano na ngi ba lah ban im tang ïalade shimet hynrei, baroh ka dei namar jong u Trai Kynrad. Bad dei halor kata ka nongrim ba u Krist U la shah ïap bad U la mihpat khnang ba Un long u Trai bad u Kynrad jong kiba im bad kiba ïap.

Ka Kospel mynta ka sngi ka pyni ba haduh katno ka khraw ka jingieid bad ka jingmap ka jong u Blei ïa ngi ki nongpop baroh. Lada ngi long kiba lah ban ieid bad ban map kum ma U, te U ruh Un pynkhraw ïa ngi ha ka Hima Bneng ka jong U bad Un sa pdiang hun ruh ïa ki kam jong ka jingim ka jong ngi. Hynrei, lada ngim patiaw ei ei bad lada ngi leh bym suidñiew ïa ka jingieid ka jong U te Un sa bitar ïa ngi. Kaba mut ruh ba lada ngim lah ban ieid bad ban map para briew, u Blei Un ym sngewbha da lei lei ruh bad Un sa tian bishar ïa ngi kumba ngi la ïohsngew na ka Kospel kaba mynta ka sngi shaphang ka pharshi jong uwei u shakri ba haram.

Kumba ong u Paulus Apostol, kan ym myntoi ïa ngi ban duwai ïa ka jingduwai “Ko Kpa jong ngi…” lada ngim pat lah shisha ban ïa ieid bad ban ïa map markylliang.

Yn ïaroh ïa u Jisu Khrist, junom la junom. Amen.