Ki Jingpule:
Banyngkong – Esekiel 33:7 – 9
Psalms – 95:1 – 2, 6 – 9
Ba-ar – Roman 13:8 – 10
Kospel – Mattheus 18:15 – 20
Ha ka jingpule kaba nyngkong mynta ka sngi ngi shem ba u Blei U khot ïa ngi da ki nongap-phira kiba kitkhia ïa ka jingbthah jong u kynrad. Namar kata, ngi don ïa ka lyngkor kaba khia bha ba ngin kit bad kata ka long ba ngi dei ban sngap bha ïa ka hukum bad ka jingong lane ka jingbthah ka jong u Blei. Ngi don ïa ka kam kaba ngin ïarap lem ïa kito kiba donkam ïa ka jingïarap ka jong ngi.
Lada ngi don ha kano kano ka kyrdan jong ka jingim ruh, ka kamram ban ïalam bad hikai ïa kiwei sha ka lynti ka babha ka dei ka jingim tip-briew tip-blei ka jong ngi hi. Lada ngim lah ban leh kumta, bad kito kiba im ha ka pop kin ïap noh te u Blei Un sa tei pap ha ngi ïa kata baroh kaban jia. Hynrei, lada ngi lah ïaleh katlah katïai ban hikai bad ban sneng lem, phewse kim kylla ka jingim te ïa kata ngim kit pap ei ei ruh ha khmat jong u briew bad u Blei.
Ka jingpule ka ba-ar pat ka kren shai ha ngi ba lada ngi don ïa ka jingieid ka ba pura kata hi ka la lah ban tehsong ïa ka jingbha wat hapdeng jong ka jingeh kaba khraw kaba ngi ïakynduh na ka por sha ka por. Haba u Paulus Apostol Bakhuid u ong “Kit-ram” kaba mut ba ngin hap ban siew dep ïa ka. Te ngim dei ban kit-ram hano hano lane ha kaei kaei lat tang ïa ka jingieid bad kane kan sa btin lynti ïa ngi baroh ba ngin siew kylliang da ka jingieid ïa baroh ha baroh ki liang. Ka jingieid ha ka Jutang Bathymmai ka dei ka jingpynpura ïa ka Shiphew (10) Hukum jong ka Jutang Barim.
Baroh ki jingmlien basniew ki jingkwah rhah bad kiwei kiwei kum kine kin jah noh haba ngi don ïa ka jingieid ka bashisha jong u Khrist. Dei namar kata hi ka daw ba u Jisu U la wan ban longbriew sha kane ka pyrthei ban ai ha ngi ïa ka jingieid ka bapura ka jong U namarba, ma ngi baroh ngim pat don ïa ka jingieid blei kaba u don.
Ka Kospel mynta ka sngi pat ka hikai ïa ngi ba ngin ïa sneng bad kyntu ïa u para ne u bahaïing lane uno uno u parabriew ban ïaid ha ka lynti ka hok lada u lah ngat ha ki jingbakla jong ka jingim. Sneng bad pyni ïa u bad lada um ngeit satia khot sa katto katne ngut ban ïasynran lem ha kata ka kam hynrei, lada um patiaw eiei, khot ïa ka kynhun ban ïa pyni lem. Lada u ngeit bad kylla phin ïoh ïa ka jingaiei kaba wan na u Blei bad lada um kylla wat hadien jong ka jingsneng ruh ïa kata un sa kit pap hi da lade hakhmat jong u Blei. Na kata ka daw ngi donkam ban sneng bad pyni lem katba ngi lah. Lada ngi lah hikai bad sneng ïa ka jingim ka jong u ngi pyndep ïa la ka jong ka kamram Khristan ka jong ngi hynrei, ngim dei pat ban shul eh tang dep rukom naba u Blei Um sngewbha.
To ai ko hynmen ko para baroh, ba kane ka sngi kan long ka sngi kaba kyrsiew thiah ïa ngi na ka jingtlot jong ka jingim briew bad ba ngin im thymmai ha ka jingieid bad ka jingmap ka jong u Blei.
Yn ïaroh ïa u Jisu Khrist, junom la junom. Amen.
){kind=link}
0 Comments