Tarik: 02-08-2020
Jingpule:
1 Syiem 19: 9a, 11 – 3a
Psalms 85: 9 – 14
Roman 9: 1 -5
Matheus 14: 22 – 23
Hato ngi shem ïa u Blei bad ngi ïakynduh ïa U? Ban jubab ïa kum kane ka jait jingkylli kam dei satia kaba suk bad ka dawa ïa ka ka jingngeit kaba skhem ban ai ïa ka jubab ka badei.
Ha ka jingpule kaba nyngkong ngi shem ba u prophet Elija u wad ïa u Blei. Kane ka jia hadien ba u la shem ïa ka jingeh kaba khraw bad ba ka jingim ka jong u ka don hapdeng ka jingma bad kumta u la phet sha u lum Horeb uba long u lum u Blei. U la sahmiet ha kawei ka krem. Dei ha kata ka por ba u la ïohsngew ïa ka sur ka jong u Blei kaba kren ha u bad ka ong
“Phi leh aïu hangne, ko Elija?” 1 Syiem 19: 9.
Nagta u la shah hokum ban mih noh na kata ka krem bad ban leit ïeng ha u lum ba la bthah ïa u. Kumta u la wad ïa u Blei hynrei um shym don ha ka lyer ka bajur, lane ha u jummai lane ha ka ding.
Hynrei ha ka jingsawa bajem jai jai u shem ïa u Blei bad markumta hi u tap khlup ïa la ka khmat da ka barandi jong u bad u la mih nangta ban leit ïeng shakhmat ka krem. Markumta hi sa shisien pat u la ïohsngew ïa ka sur ka jong u Blei kaba la kren biang h u
“Phi leh aïu hangne ko Elija?” 1 Syiem 19: 13.
Kane ka kdew sha ba u Blei U don ka jingthmu kab kyrpang na ka bynta jong u. nalor ba u la depban bsa ïa u da u kpu lyngba u angel (ba la shet ïa ki kpu ha ki maw khluit), U don ruh ka kam (mission) ban phah; namar kata, haba ngi ruh lada ngi ieid hok ïa u Blei, bad lada ngi wad shida ïa U, Un sa plynkhamti ïa ka kam jingpynim jong U ha ngi.
U Paulus Apostol pat ha ka shithi ka jong u sha ki nong Rome (Romans) ka pynshai ha ngi ba mano mano ruh ki lah ban long ki khun jong u Blei bad ki nongmih bujli ïa ka kam kyntang jong ka Balang. Kane kam shym la pyrkhing ban ïoh bhah lane ïohpateng tang kito kiba ïadei kur dei jait bad kiba na kajuh ka doh bad ka snam. Hynrei ban long ki nongshongshnong jong ka Hima Bneng ki lah ban long mano mano kiba lah leh ïa ka mon jong u Blei.
“…ym dei ki khun ki ka doh kiba long ki khun u Blei; dei ïa ki khun ka jingkular ba yn ñiew kum kiba hiar pateng.” Romans 9: 8.
Ha ka Kospet pat ngi shem ba u Petrus Bakhuid u dang artatien shaphang u Jisu. Hooid u don ïa ka jingngeit hynrei ka jingngeit ka jog u kam pat laong satia kaba skhem – balei ka long kumta?
Kumba ngi shem haba u Jisu u la kren ha ki synran
“Wat tieng, wat tieng! Dei ma Nga!” Matheus 14: 27, u Petrus u la jubab “Ko Kynrad, lada dei ma Me, to hokum ba ngan wan halor ka um sha Me.”
Na kane ka jinglong jong u Petrus, ngi shem ba ma u u dang dei tang u briew uba kohnguh sneng bad uba khawpud ha kajuh ka por. Ka jingkohnguh sneng ka jong u ka khlaiñ ban ïa ka jingngeit bad dei halor kata ka nongrim ba u Blei um sngewtynnat bad U la ong ha u Petrus
“Balei phi artatien? Katno phi dang duna ka jingngeit?”
To ai ba lyngba kine ki jingpule kiba ngi lah ïohsngew, u Blei u ïaisynran bad ai bor ïa ngi ban gin shem jinghun mynsiem haba ngi wad ïa U da ka dohnud ka bashida.
Yn ïaroh ïa u Jisu Khrist
Junom la junom. Amen.
0 Comments