Ka Taiew Lait-ïa Ba Arphew-wei (Twenty-first Sunday In Ordinary Time)

Tarik: 23-08-2020

 

Jingpule:

Isaia: 22:19 – 23.

Psalm: 138:1 – 6, 8.

Roman: 11:33 – 36.

 

Isaia. 22:13“Ïa ngin ïabam ïadih, ba ngi ïap lashai.”

 

Ha ka jingpule kaba nyngkong, ngi shem ba ki briew kim kynmaw shuh ïa u Blei bad kumta ka pynlong ïa U ba Un bitar. Thik kumba long ha ka jingpule kaba mynta ka sngi ngi ruh ngi ïohmad ïa ka jingeh jingjynjar jong ka por na ka daw jong ki nongïalam jong ngi.

Ngi la san ha ka jingshah hikai ban klun tang ïalade ban khwan ban kwah rhah. Ïa kaei kaei kaba ngi ïoh ngi mut bad kam trai ba dei tang ka jong ngi, ym ka jingkyrkhu ka jong u Blei, ngi la klet ïa U!

Hooid u Blei U bitar shla ïa ka rukom im lyngkar ka jong ngi U ai ka por jong ka jingtynjuh bad U ai ruh ka lad ban kylla kabamut na ki kam bymhok ki jong ngi. Dei namar kata ngi ïoh ïa ka lad jong ka jingkyrmen wat hapdeng jong ki jingeh jingjynjar bakhraw kiba ngi ïohmad ha ka lynti jong ka jingim ka jong ngi.

Ka jingpule kaba ar pat ka hikai ïa ngi a ngin dei ban sngewstad ne sngew shemphang ban ïa u Blei. Ha ka jingshisha, dei u Blei Uba kham stad ban ïa ki jingthaw ki jong U. Mano ba nud ban batai ïa U? Hato don ba lah ban hikai ïa U? Da lei lei ruh em! Yn ym don satia uno uno u jingthaw uba lah ban long hajrong ban ïa la u Kynrad jong u. Ym don uwei ruh napdeng jong ngi uba sah ram ha u Blei. Hynrei, baroh ka wan a U bad baroh kan sa phai biang sha U bad ha U kan long ka burom junom la junom.

Ka Kospel kaba mynta ka sngi ka khot ka wer biang ïa ngi sa shisien pat ban puson jylliew bad ban sngewthuh ïa ka jinglong Khristan bashisha ka jong ngi da kaba ngi dei ban kylli ïalade “Uei u Khrist ïa nga?” lane “Uei u Khrist na ka bynta ka jong nga?” Kane ka long ka phang Pdeng jong ka jinglong Khristan bashisha ka jong ngi ba lada ngi tip shai ba u Khrist U dei Uei na ka bynta jong ngi kan jin da la bha shibun ka rukom im ka jong ngi.

Ban lum lang ïa ka mat ba kongsan mynta ka sngi ka long: lada ngi ithuh ïa u Blei, ngi kynmaw ïa U barabor bad ruh ban ïai bud ryntih ïa ki jinghikai ki jong U, Un jin da sngewbha shikatdei eh ïa ngi.

To ai ko hynmen ko para ba kane ka sngi lyngba jong kine ki lai tylli ki jingpule kiba ngi la ïohsngew kan btin lynti ïa ngi baroh sha ka jingim kaba khuid bad kaba hok. Bad ruh to ngin ïai kynmaw ïa ka daw jong ka jinglong bynriew jong ngi ha kane ka sla pyrthei ba ngin kamai tang ïa ka hok ka sot.

Yn ïaroh ïa u Jisu Khrist
Junom la junom. Amen.