Ka Taiew Lait-Ïa Ba Khathynñiew (Seventeenth Sunday In Ordinary Time)

Tarik: 26-07-2020

Ki Jingpule:

Banyngkong – 1 Syiem 3:5, 7 – 12

Psalms – 119:57 & 72, 76 – 77, 127 – 130

Ba-ar – Romans 8:28 – 30

Kospel – Mattheus13:44 – 52

U Blei u paw ha u Solomon ha ka jingphohsniew ka jong u, bad u Blei U la kular ha u Solomon ba Un sa ai ïa kat kaba u pan na U. ha ka jingsngewrit u Solomon u la ïakren bad u Blei bad ban pdiang ïa ki jingkyrkhu jong U. ha kajuh ka por u kyrpad na U ïa ka dohnud ba sngewthuh ban bishar hapdeng jong u paid byllien bad ruh ban pynïapher hapdeng kaba bha bad kaba sinew.

Dei namar ka jingsngewrit ka jong u Solomon hi ba u Blei U la ai ha u ïa ka jingaieiblei kaba khraw tam, ha kaba ym shym la don kiba ha shuwa jong u kiba pan kum ma u bad yn ym don hi ruh hadien habud ruh kiban sa leh kumta. Namar ka hok ka don ha ka dohnud jong u Solomon, te kumta u Blei U la kyntiew burom ïa u ha ka kyrdan kum u nongïalam bastad bad uba shemphang hapdeng jong ki paid ba la jied ki jong U. kumta phi shem ba u Solomon um shem la pan ïa ka jingmyntoi lade kum ka ryta kaba jlan bad ka spah ka phew ba un im pahuh pahai; hynrei, u la pan pynban ïa ka jingstad bad ka dohnud kaba hok bad kaba khuid ha ka jingim ka jong u.

Romans – 8:29 – 30 “…ïa kito kiba la ithuh lypa, U la thmu lypa… ïa kito kiba U la mang lypa, U la khot ruh; ïa kito pat kiba U la khot, U la pynmanhok ruh; bad ïa kito kiba U la pynmanhok, U la pyndonburom”.

Kane ka paw shai kdar ba ka jingkhot ka jong u Blei ka long shisha kaba janai bad kaba kyntang tam. Um ju iehnoh da lei lei ruh ïa kito kiba U la khot. Bad kumta, phi ïohsngew bad phi tip shaphang u Prophet Jeremaia Nongïathuh lypa ba u Blei U la jied ïa u naduh ka por ba u don ha ka kpoh jong ka kmie ka jong u. Kumta ka long ïa kino kino ruh kiba u Blei hi U la jied Un sa synran ïa ki baroh shilynter jong ka jingim ka jong ki, khang ba kin dup pyndep pura ïa ka kam bamaïan ka jong U. Ym tang kata, Un ri Un sumar ruh ïa ki bad Un pynjanai bad ban pyndonburom ruh de ïa ki.

Ka Kospel pat ka batai ïa ka jingmut jong ka Hima jong u Blei bad ruh la pynïasyriem dur ha ki lai (3) bynta:-

1   1. La pynïasyriem dur bad ka Spah ba la tep ne buhrieh ha ka kper.

     2.  La pynïasyriem dur bad u Mawkordor ba la ïoh biang.

    3. La pynïasyriem dur bad ka Jar ba la pynngam sha ka duriaw ban tong ïa ki dohkha babun jait.

Ha kine baroh lai tylli ki jingpynïasyriem dur jong u Jisu ïa ka Hima ka jong u Blei, la shem ba ka long ka daw jong ka jingkmen haba ïoh ïa Ka.

Bad katduh eh, ka hok ka ïeng rasong ha khmat u Blei bad kata ka long ba ha ka Hima jong U dei tang kiba khuid bad kiba hok kin ïoh ban rung. Kam shym la mut ba tang ka jinglong khristan ka jong ngi ka lah biang, hynrei ka dawa ruh ïa ka jingim kaba khuid bad kaba hok ban ïoh ban shongneh ha ka Hima ka jong u Kpa Bneng jong ngi Uba long u Blei Laiwei.

To ai ba kine ki jingthoh bakhuid kin ïaisah bad ngi man la ka por bad ba ngin sngewthuh ïa ka mon jong u Blei bad ban leh ruh ïa ka.

Yn ïaroh ïa u Jisu Khrist, junom la junom. Amen.