Ïa ka jingpule banyngkong la shim na ka Kitab jong u Amos 6:1a, 4 – 7, ïa ka jingpule baar pat la shim na ka Shithi banyngkong jong u Paulose Apostol sha u Timothi 6:11 - 16. Bad ïa ka Kospel pat la shim na ka Kospel Bakhuid katkum u Lukas 16:19 – 31.
Psalms 146:7, 8, – 10 (1b).
Hato ngi tip bad ngi sngewthuh shaei ngi dei ban poi? Bad kum kano ka jait jingim kaba ngi im mynta? Kum kine ki jait jingkylli ki dei ban kyrsiewthiah ïa ngi kum ha kine ki por ba mynta ba la synshar da ka spah.
Haba ngi phi sha ka jingpule banyngkong ïa kaba la shim na ka Kitab jong u Amos, ngi shem ba ki briew ha kito ki por im tang ha ka sngewbha pyrthei bad ki klet pat ïa la u Kynrad uba long u Blei.
Kumjuh ruh kim da pyrwa eh ïa la ka jingim kaba ki im. Ka spah jong ka pyrthei kaba ki don ha lade ka la pynlong pynban ïa ki ka jingbitar shla jong u Blei.
U Blei u tim ïa ki jait briew kiba kum kito naduh kito ki por jong u Amos ba ki pynlong blei ïa la ka spah ka hajar bad ñiewbeiñ ïa la u jong u Nogthaw. Naba ki im tang ha ka jingsahuh ha kaba ki thiah ha ki jingthiah bad ki ñuti ha ryngkat ka ksiar ka ksah kaba ki deng bad ruh ki bniat hati bad ki riam ki khor ba remdor. Ki bam ha la ka mon lajong, ki tem ki sngewbha ha la ka rwai ka siaw jong ka jingim ba isaitmet. Hynrei kim don pat ka jingsengew ïa ka jingdonkam jong ki hynmen para bad ka imlang sahlang jong ki.
Ha ka jingpule ba-ar pat ngi shem ba u Blei U kren ha ngi mynta ka sngi ba ngi dei ban im husiar ïa la ka jingim ba ngim dei satia ban shah pynngop ha ki kam jingkwah brai jong kane ka pyrthei. Naba u Paulose Apostol u kren ha ngi ba ki briew ki jong u Blei bad kiba ieid Blei ngi dei ban kiar raieh raidam na kum kita ki jait jingsniew kiba lah mana da u Blei.
Kum ki khun baieid ki jong u Blei, ngi dei ban ïaithrang barabor ïa ka hok ka sot, ka jinglong blei bad ka jingriewblei, ka jingngngeit kaba skhem ha ryngkat ka jingieid, ka jingïaineh bad ka jinglui-lui. Da ka jingngeit kaba skhem ngin sa lah shisha ban ïaleh pyrshah ïa baroh ki jait jingsniew bashyrkhei ha pyrthei. Ka jingapkhmih lynti ka jong ngi ïa ka jingim lawei kam dei satia ban shu jah noh. Bad kumba ngi lah dep ban kular bad phla ha ka por kaba ngi pdiang ïa ka Sakrament Baptisma; ngi dei ban ïeng skhem ha la ka jong ka nongrim jong ka JINGNGEIT.
U Trai Jisu Khrist, Uba long Uba na bymjukut bad u Syiem jong ki syiem baroh Un sa wan ban synshar shen ïa kane ka pyrthei kaba ngi im bad shong. U dei Ubym ïap shuh bad Uba im junom bad Un sa ïoh halade ïa ka Burom bad ka Bor.
Haba ngi phai pat sa sha ka Kospel mynta ka sngi ngi, shem ba ka ïathuh ïa ka jingjynjar jong kito kiba riewspah ha ka doh ha ka akher ka sngi. Ïa kito kiba kynshew spah ha ka pyrthei u Blei Un sa pynshitom bad pynsaja shilynter jong ka jingim lawei jong ki, naba kim ñiewkor ïa U lane wat ïa la ki para briew katba ki dang im ha sla ka pyrthei. Bad ïa kito kiba im pat ha ka jingim ba hok bad ba tipbriew-tipblei kin sa ïohpdiang ïa ka pansngiat ksiar jong ka jingim lawei ha ryngkat ka jingsuk jingkmen jong ka jingim.
Te namar kata ko hynmen para baieid baroh, u Blei U kwah ïa ngi baroh ba ngin im ka jingim kaba tipbriew-tipblei ha ryngkat ka hok ka sot. Kumba ngi ki khun Khasi khara ngi ngeit skhem ïa kajingwan longbriew jong ngi sha kane ka pyrthei ka dei tang namarba ngin kamai ïa ka hok ka sot. Kam pher wat la ngi duk ha ka liang jong ka doh hynrei ngi lah pat ban pyndep hok ïa ka deiti jonglong briew babha ha kane ka pyrthei.
Ka spah kam dei ban long ka nongsynshar jong ngi. Ngi hi ngi dei ban long ki kynrad jong ka spah bad jong baroh ki jait jynthaw ha sla jong ka pyrthei.
Lada ka spah kaba mih na ka jingtrei ka jong ngi ki briew kan synshar ïa ngi, te katno kan long ka
jingjemdaw bad ka bynta bapoh tam ha ka jingim ka jong ngi bad u Blei ruh Un nym sngewbha ïa kata ka jingim jigleh jong ngi da lei lei ruh.
Te, ko hymen ko para bangeit baieid baroh, to ngin ïa phai sha u Blei Trai Kynrad jong ngi u Trai Jisu Khrist ha kane ka por ban kyrpad na U ïa ka jingaiei kaba kyrpang kaban pyllait ïa ngi na ki jingsniew bad jingsarong jong ka jingim pyrthei.
Yn ïaroh ïa u Jisu Khrist.
){kind=link}
0 Comments