Ïa ka jingpule banyngkong la shim na ka Kitab jong u Isaiah 66:18 – 21, ïa ka jingpule baar pat la shim na ka Shithi sha ki Hebru 12:5 – 7, 11 – 13. Bad ïa ka Kospel pat la shim na ka Kospel Bakhuid katkum u Lukas 13:22 – 30.
🎶 Psalms 117:1, 2.
Kaei kaba u Blei U kwah ban ïathuh ha ngi mynta ka long kaei kaei kaba kham khraw, kata ka long ba u Blei U kwah ba baroh ki paid bynriew kin tip ba U long Uba khraw bor bad ka burom. Ka jingkhraw bor ka jong u Blei ka palat liam ïa ka kyrdan ka jong ki syiem pyrthei. Shuh shuh ngi shem ba u prophet Isaiah u ïathuh ba ka por jong ka jingsynshar ba hok ka jong u Blei kan sa wan shen, bad hangta baroh hi kin sa ïohi ba haduh katno kan long kaba khraw ka burom bad ka bor ka jong u Blei Nongpynim jongngi.Un sa jied ruh ïa ki katto katne ngut napdeng jongngi ban long ki Lyngdoh bad ki Lebi kiba trei kum ki nongïalam ba radbah ki jong U hapdeng jongngi.
“Ïa ki katto katne ngut na ki Ngan sa pynlong ki Lyngdoh bad ki Lebi, U ong u Trai.” (Isaiah 66:21)
Ka Shithi sha ki Hebru kumba ngi tip katkum ka jingwadbniah, ym shem la tip thikna ïa ka kyrteng jong u Nongthoh.
Kane ka Shithi sha ki Hebru ka hikai aiu ïa ngi mynta ka por? Ka jinghikai ka jong ka ka long ba, ngi dei ban tip ïa ka jingïaidbeit bad ka jingryntih ka rukom im jong ngi kaba man la ka sngi. Ka dei ka deiti Khristan ka jongnga bad ka jongphi ba ngin shah sneng shah kyntu bad ban treishitom ban im da ka jingsngewthuh ïa kiei kiei kiba ngi leh. Namarba lada ngim lah satia ban im da ka jingsngewthuh ïa ka jingim, hangta kan mih ka jingkulmar bad ka jingsuda jong ka. Kumba ka Ktien u Blei hi ka ong ba ka don ka por ïa kiei kiei baroh. Te kaei kaba donkam ïa ngi ban leh ka long ba ngin pyndep hok ïa ki kamram katkum ka bhah ba la bynta bad bynshet ha ngi. Ngim lah ban shu shongthait sah baroh shi sngi, ban shu bam sah lane ban shu lehkmen sah! Ngi donkam namarkata ban tip ïa ka por ban leh ïa kano kano ka kam ba la bhah ha ngi da ka jingsngewthuh.
U Blei, U sneng U kraw ïa ngi ha man la ka por bad ka jaka bad ruh U ju ai mynsiem ïa ngi ban im bha bad ban jop ïa ka thong jong ka jingim.
Ban shah sneng ka long shisha kaei kaei kaba ngi ngim da sngewtynnat eh ban sngap khamtam ha kane ka juk kaba mynta. Hato ju don mo u kpa ne ka kmie ki bym ju sneng ïa la ki jong ki khun ki kti? Katno tam lei u Blei bahalor tam Un da sngewbha shibun ban sneng ban pyni ïa ngi ïa ka lynti kaba bha. Ka jinglong jingim ka jong u kpa bad ka kmie ha pyrthei kim kwah ba ki khun ki jong ki kin sakma bad jot ka jingim. Kumta katno tam lei u Kpa bahabneng jong ngi Un leh ïa kata ka kamram jong U kum u Kpa bad u Blei. Hynrei kaba sngewsih ban ong ka long ba mangi hi ngim da sngewtynnat shuh ïa ki jingsneng jingpyni jong kiba la san. Ba bunsien hi ngi ha kane ka juk kaba mynta ngi shu leh mynleh ba tip bad sngewthuh ïa bun kiei kiei kiba ngi hi ngi tip ba ngim pat da tip ne sngewthuh shai.
Te balei ka leit jia kumne ha ngi? Ka daw baroh hi ka long ba ngim long ki briew kiba sngewrit bad kiba pyndem hakhmat jong kiba la san. Kumta ngi ïakynduh ïa shibun ki jingeh bad ki jingtynjuh lada ka long tang kaba rit eh ruh, nambar ba ngim lah ban ïaleh pyrshah ba ngi im sngi barabor tang ha ka jingsngew hangamei bad ka jingkheiñ bastad ïalede. Ka deiti ban pyndep hok ngim sngew don por shuh bad ngi shu lapmiet noh sa tang ha kiei kiei ki bymlarkam. Ban phikir ïa ka rukom im ha ka longdoh bad ka mynsiem ka dei ka kamram Khristan bajanai. Phewse, ngi pat ngi ju shah ïalam bakla na ka por sha ka por.
Kumta haba ngi la sakma ka rukom im ka dei hok ne em ba ngin ïoh jingsneng bad jingpyni jong ki bahalor jongngi? Ngi donkam eh ïa ka namar jong ka lawei babha ka jongngi. Hooid ban shah sneng shah pyni ka long shisha kaba kthang bad bym sngewtynnat, katba u soh jong ka pat u long shisha u soh jong ka jingkyrkhu bad ka jingaiei ïa ngi, naba u Blei U sneng u pyni ïa ngi ïa ka lynti ka jingbha jongngi ym ba U kput ne lehbeiñ ïa ngi wat la ngi pop ruh.
Ka jinglong Khristan ka jongngi kam pat long kaba pura lada ngim pat lah satia ban ïm da ka jingsngewrit bad ka jingïaishah. Ngi donkam ban trei shitom miet la bad sngi ban ïaid da ka lynti kaba khim ka ban ïalam ïa ngi sha ka jingim bynjukut, ban ïa ka lynti kaba ïar, kaba ïalam ïa ngi sha ka jingjot. Kane ka thew ïa ka rukom im kaba ngi kum ki briew. Ka jingim ka bym ju pyrwa, ba snewhangamei, ba mynthi, ba mutlop bad kaba sarong ka dei ka lynti sha ka jingjot.
Ban ïoh rung ha ka Hima ka jong u Blei dei tang lada ngi lah shisha ban ïaid ha ka lynti jong ka hok bad ka jingshisha da kaba ngi sngewthuh shai ïa la ka kamram kum ki khun jong u Blei. Ba ha ka akher ka sngi u Blei Un sa bishar tang da ka hok, bad ha U ym don satiat ka kam klop ne ka thoh ka shukor. Bad dei tang kito kiba la leh bad pyndep hok ïa ka deiti Khristan kin sa ïoh rung da kaba suk sha ka Hima ka jong U. Te namar kata ngim dei ruh ban buhteng ïa kano kano ka kam kaba bha ïa kaba ngi la tip bad sngewthuh shai ïa u soh jong ka.
Yn ïaroh ïa u Jisu Khrist.
){kind=link}
0 Comments