Ka Taiew Ba Khatkhyndai Ha ka Por Laitïia (Nineteenth Sunday In Ordinary Time)

11 Tarik Nailar

Ko hynmen para ha u Trai jong ngi u Jisu Khrist, mynta ka sngi ïa ka jingpule banyngkong la shim na ka Kitab Jingstad 18:6 – 9; ka jingpule ba ar pat la shim na ka Shithi sha ki Hebru 11:1 – 29 bad ïa ka Kospel pat la shim na ka Kospel Bakhuid katkum u Lukas 12:32 – 48.

🎶 Psalms 33:1, 12, 18 – 19, 20 – 22(12b).

Ha kaba sdang jong kane ka taiew u Blei U kwah ba mangi baroh ngi dei ban im barabor ha ka jingkyrmen bakhraw ïa kiei kiei kiba ngi ngim lah satia ban ïohi ha kane ka por. Hynrei kane kan sa wanlam ïa ki bor jingaiei ki jong U katba dang mih ki sngi bad ki por ha ka jingim.

Ka jingpule ka banyngkong ka hikai ïa ngi ba ngin peit khmih ïa bun kiei kiei kiba ngi ju ïakynduh ha ka jingim kum ka jingim babha, ka jingminot, ka jingduwai, ka jingïaishah, ka jingkyrmen, bad ruh kum ki jingmlien basniew, ki jingthrew ka doh, ka pop kyllum hi baroh. Namar ba baroh kine kin don la ka jingbishar ba hok ka jong u Blei. Ka jingim babha kan ïoh ïa la ka bainong kaba khraw hakhmat u briew bad u Blei bad kumjuh ruh ba ka jingim ha ka pop kan sa wanrah ïa ka jingbitar shla ka jong u Blei.

Kum kiba ngeit ha u Trai Nongpynim, ngi don ka jingngeit bad ka jingkyrmen kaba khraw namar ka jingkular ka jong U ka dei shisha ka jingkyrmen jong ngi.

Ka jingngeit ka long ka jingsngewskhem shaphang kaei kaei kaba ngi kyrmen ban ïoh, bad ka jingsngewthikna shaphang kiei kiei ba ngim ïohi (Hebru 11:1).

Te kumta ngi shem ba ka jingïaid lynti jong ki kpa tymmen jong ngi ka long shisha kaba shong nongrim ha ka jingngeit bad ka jingshaniah tylli ha u Blei Nongpynim.

Ka jingpule ba ar pat ka bteng ïa ka jinghikai ba ka jingkyrmen kam lah satia ban ïaid lait na ka jingngeit. Ki kpa tymmen ki jong ngi ki la ïaid ïa ka lynti kum ki khun khristan ha ka jingngeit ryngkat ka jingyrmen ba ki ap khmih lynti ïa kiei kiei kiba bha tam kiba ki kyrmen ban ïoh ha ka jingim. U Abraham u la im da ka jingngeit haba u kyrmen ïa ka kular jong u Blei. U ïoh ïa la ka jong ka bhah ka bynta namarba u la ngeit. Kumjuh ruh ka Sara ka briew kaba lah tymmen ryta, kaba ym lah shuh ban ïoh khun katkum ka ryta jong ka, ka la lah ban kha ïa u khun ha kata ka ryta tang namar ba ka la ap khmih lynti ïa ka jingaiei ka jong u Blei da ka jingkyrmen ka jong ka ryngkat bad ka jingngeit ka ba skhem.

Naba ha kaba ka spah jong phi ka don, ka dohnud jong phi ruh ka don (Lukas12:34).

Ka jinglong khristan ka jongngi ka dawa ïa ka jingtrei shitom bad minot ha ka lynti kaba bha. U Jisu U kwah ba ngin kynshew ïa ka spah bneng ban ïa ka spah pyrthei. Ka spah pyrthei kan sa duh noh bad kan ym lah satia ban ai jingpynim ïa ngi. Hynrei, ka spah bneng ka lah ban pynshisha ïa ki kam jong ngi hakhmat u Blei khnang ba ngin ïoh ïa la ka jong ka bhah jong ka jingpynim ïa kaba ngi la ap kyrmen.

Ko hynmen para to ngin kyndit bynriew noh ba ïoh lap ba dier ka por, ka hima ka jong u Blei ka la jan bad lada ngi im tang ha ki jingkwah rhah bad ka jingkynshew spah pyrthei ka por jong ka jingwan ka jong u Blei kan sa lap ïa ngi kum u nongtuh bad hangta ngin ym lah shuh ban kyrtiang dien ïa ka jingim.

Te namar kata to ngin ïa im ïa ka jingim kum ki khun ba laitluid jong u Blei ba ngin kamai ïa ka spah bneng ka ban neh junom bad ba ngin im barabor ha ka jingkyrmen kaba skhem da kaba ksoh triang ha ka jingngeit.

Suk ïa ngi lada u Kynrad U lap ha ka por ba ngi dang trei hok ïa la ka kamram.

Yn ïaroh ïa u Jisu Khrist.