Khublei ïa phi ki hynmen para baroh ha u Trai jongngi u Jisu Khrist.
Ka Taiew kaba Khathynñiew ha ka por laitïa. Ïa ki jingpule banyngkong la shim na ka Kitab Genesis (Jenesis) 18:20-32, ka jingpule ka baar na ka Shithi u Paulose Apostol sha ki Khristan ha Kolosse 2:12-14 bad ïa ka Kospel pat la shim na ka Kospel Bakhuid katkum u Lukas 11:1-13.
🎶 Psalm 8:1-2, 2-3, 6-7, 7-8 (3a)
Na kine baroh lai tylli ki jingpule, ngi shem ba u Blei U pynkhuid ïa ngi na ka pop (pap) ka sang bad ruh ba ngin pan jingïarap na U ha ki khyllipmat kiba ngi kyrni ha ki jingmlien basniew. To mynta ngin ïa peit aiu ka Ktien jong u Blei ka batai ïa ngi.
Ha ka Kitab Genesis (Jenesis) 18:20-32, u Blei U pynpaw ïa ka jingkhraw jong ka jingieid ka jong U ïa u khunbynriew uba shai ka ktien ka thylliej bad uba suba ka jinglong. Ngi shem ba u Abraham u ïasaid hakhmat jong u Blei ba Un sngewsynei ïa uno uno uba shaniah shkem ha U. Namar ba ka jingim ka jong ki briew ka lah shu kyrsum ha ka pop ka sang bad ka jingim kaba jngai na u Blei Nongpynim. Ka Sodom bad ka Gomorrah (Komorrah) ki dei ki shnong kiba lah jyllei ha ka pop jingbymsuitñiew ia ka akor burom bad ka tipbriew tipblei.
Ha ka jingbitar, u Blei U la mut ban pynjot noh thiaw ïa ki, hynrei, namarba ki don pat ki briew kiba bha ha kita ki shnong, u Blei, U la suki ka jingbitar bad U sngap ïa ka jingkyrpad ka jong u Abraham. U Abraham, u la ïasaid bad kyrpad hakhmat jong u Blei, Trai Kynrad na ka bynta ki paid ki jong u ba kin ioh im. Bad ka jingïasaid ka jong u Abraham ka long shisha kaba seisoh shibun namarba u Blei U sngap ïa u.
Ko para bangeit, to kynmaw barabor ba ngi im hapdeng jong ka pop bad ngi baroh hi ngi long ki nongpop. Te namar kata, ngi dei ban da puson bniah ba ka jingim kam dei ka jingïalehkai bad ba akor longbriew manbriew ruh kam dei ban duh noh na ngi. Ngi dei ban ïai kynmaw ïa u Blei jongngi bad ba ngin tieng burom ïa U. Ha U ka don lang ka jingisynei bad ka jingbitar. Khnang ba ngin lait na ka jingbitar ka jong u Blei, ka dawa ïa ngi ba ngin im hok katba ngi lah ha man la ka khyllipmat jong ka jingim.
Haba ngi phai pat sha ka jingpule ka baar ïa kaba la shim na ka Shithi u Paulose Apostol sha ki Khristan ha Kolosse 2:12-14, ngi shem ba lyngba jong ka Baptisma Bakhuid kaba ngi la ïohpdiang, ngi la kylla long kiba khuid bad ki khun binong bishon ki jong u Blei. Ïa ngi la ai ïa kata ka bhah ka bynta ban long ki nongshong shnong ba pura jong ka Hima Bneng da u Khrist lyngba ka Baptisma Bakhuid. Ki pop ki sang bad ka jingtlot briew ka jongngi la weng la kyndat bak na ngi da ka Baptisma Bakhuid. U Jisu Khrist, U la kylla long U Kynrad jong ka jingim ka jongngi. Ha ka Baptisma, ka pop raibi ka la ïap duh bad ryngkat ka jingngeit kaba ngi don ha u Blei ka la pynjanai ïa ka jingim Khristan ka jongngi da ka jingtreikam baphylla bad ba donbor ka jong u Blei u Kpa.
Ïa ka jinglong mraw ka jongngi, la sah nar khak ha ka diengphna ka jong u Khrist. Bad da ka snam bakordor tam ka jong U la sait khuid phar ïa ngi ba ngin sa kylla long ki khun jong u Blei.
Ka Kospel pat ka wanrah ïa ka jingjanai jong ka khubor jingpynim ba, u Jisu Khrist hi da lade U hikai ïa ngi ban duwai kumba U la hikai ïa ki synran jong U ha ki por ba mynshuwa. Hangne, ngi ïohi ba kumno u Jisu Uba long U khun jong u Blei ruh U duwai, bad uwei na ki synran u kyrpad ïa U ba un hikai lem ban duwai. Khlem da shim por u Jisu U la hikai ban duwai ïa ka jingduwai “Ko Kpa Jongngi… .”
Ngi ju ïohsngew na kawei ka por sha kawei pat ba ka kam ka ju kren kham bunshah ban ïa ka ktien. Te kaei kaba u Jisu U la leh ka long shisha kaba bha tam. U la ai nuksa sha kiwei da ka kam ym tang da ka ktien kaba u shu kren. Kane, ko hynmen ko para baroh kaba u Jisu U kwah ïa ngi ruh ba ngin leh ha ka jingim kaba man la ka sngi kum ki khun Khristan kiba bha. Bad shuh shuh, ka jinglong Khristan ka jongngi kam long kaba pura lada ngim don ïa u Blei ha ka jingim hangne ha sla pyrthei. Hooid ngi la long ki khun Khristan hynrei, ngim pura lada ngi sah jngai pat na la u Trai u Blei jongngi.
Ngim dei ban sngewsarong tang namarba ngi lah long Khristan. Hynrei, ngi dei ban sngewsarong tang lada ngi lah shisha ban im kum ki khun Khristan kiba la sngewthuh janai ïa ka jingmut ka jong ka. Ka Kospel ka hikai ruh ïa ngi ba ngin long barabor ki briew kiba kloi ban phai sha u Blei bad ban pan jingïarap haba ngi donkam bad haba ngim sngewthuh shai ïa ki jingmut jong ka jingim. Kumba uwei na ki synran jong u Jisu u la pah ban hikai lem kumno ban duwai, te, ngi ruh ngi dei ban khot ïa ka jingïarap ka jong u Jisu ha ki por jong ka jingeh bad ki jingdonkam.
“Pan, bad phin sa ïoh; wad, bad phin sa shem; tied, bad yn sa plie ïa phi. Namar kat uba wad un shem bad ïa uba tied yn plie. Hato don u kpa uban ai ïa la u khun da u maw haba u wan pan kpu? Ne phin ai ïa u da u bseiñ haba u wan pan dohkha? Lada phi sinew katno katno ruh, phi tip ban ai da kiei kiei ki babha ïa la ki khun. Katno lei lei u Kpa bneng jong phi Un ai ïa kiei kiei ki babha ïa kito kiban wan pan na U!” (Matheus 7:7-11).
Ban pynkut, na baroh lai tylli ki jingpule ngi sngewthuh shai ba u Blei U ai ha ngi ïa ka jingkyrmen ka bakhraw ba lyngba jong ka Baptisma Bakhuid ngi la kylla long ki khun binong bishon ki jong U; kumjuh ruh ba ha akher ka sngi jong ka jingim ngin dup long shisha kiba bitdor ban rung hapoh ka Hima Bneng ka jong U. Ka jingim ha pyrthei ha ki khep ki khep ka pynduh jingkyrmen ïa ngi hynrei, u Blei lyngba jong u Khun jong U, U la ai ha ngi ïa ka jingkyrmen kaba pura bad haba ngi ïakynduh jingeh U khot kyrpad ïa ngi ba ngin phai sha U bad ba ngin pan ïa ki jingdonkam ki jongngi.
To ai ba u Blei Uba la pynkhuid ïa ngi na ka jinglongmraw ha ka pop Un ïai kyrkhu kyrdoh ïa ngi lang baroh mynta bad ha la ka ryta.
Yn ïaroh ïa u Jisu Khrist.
){kind=link}
0 Comments