Ka Taiew Ba Khatphra Ha Ka Por Laitïa (Eighteenth Sunday In Ordinary Time)

4 Tarik Nailar 2019

Ko hynmen para ha u Trai jongngi u Jisu Khrist, ka Taiew ba Khatphra ha ka Sngi u Blei jong ka por laitïa ka wanlam sa ïa kawei ka phang ba ngin ïa puson lang kum ki khun Khristan.

Ïa ka jingpule ka banyngkong la shim na ka Kitab Koheleth 1:2; 2:21-23. Ka jingpule baar pat la shim na ka Shithi jong u Paulose Apostol sha ki Khristan ha Kolosse 3:1-5, 9-11. Bad ïa ka Kospel pat la shim na ka Kospel Bakhuid katkum u Lukas 12: 13-21.

🎶 Psalms 90: 3-4, 5-6, 12-14, 17 (1)

Ka jingsuda bad ka jingbymler jong kiei kiei baroh ong u Koheleth. Haba u peit bad sngapthuh ïa kiei kiei jong kane ka pyrthei, u Koheleth u shem ïa ki jingsuda bad ki bym don jingmut. Balei u ong ïa kine ki kyntien? Ka daw ka bakhraw ka long ba u shem ba ka jinglong briew kam ju hun shilynter. Ka jingkwah ka wanlam ïa ka jingbymsuk jong u briew.

U Paulose Apostol ruh u pynkynmaw ïa ngi ba ngi dei ban pynleit jingmut tang ïa kiei kiei kiba kynja bneng. Namarba kane kan sa ïalam ïa ngi sha ka jingbha. Ka jingkwah bad ka jingïaithrang ka jongngi tang ïa kiei kiei kiba kynja mynsiem bad kiba jong ka Bneng kan wanrah ïa ki jingaiei kiba khraw ha ryngkat ka burom bad ka akor bad ka tip briew tip blei.

Kumta la khot ïa ngi ban pynïap duh ïa ki jingmlien kiba sniew bad ki jingbymkhuid baroh.

 "To pynïap duh ïa kaei kaei kaba don ha phi, kaba dang ïadei bad ka khyndew: ka jingawria, ka jingbymkhuid, ka jingkwah brai, ki jingthrew basniew, bad kato ka jingkangar kaba long ka jingmane bleithaw." (Kolosse 3:5).

Ngi la mane bleithaw man la ka por da kaba pynhun ïa ka jingkwah jong ka dohnud ka jongngi. Hato ngi lah ju pyrkhat pat ne em ba ka jingim hangne ha sla pyrthei ka long tang shipor bad ngim long kynrad halor jong ka, hynrei tang u Blei Uba long shisha U Kynrad jong ka jingim ka jongngi.

Ban kynshew spah ha sla pyrthei ka long tang ka jingkwah rhah bad ka jingkangar. Wat u Buddha ruh u ong ba ka jingkwah ka dei ka tyllong jong ka jingshitom bad ka jingjynjar baroh.

Kaei kaba mih na ka dohnud jong u briew?

"...im katkum u Mynsiem, bad phim dei ban pynhun katba kwah ka doh. Ka doh ka kwah brai..." (Galatia 16:17).

"Ka long ka bashai aiu ka mih na ka doh: ka jingawria, ka jingbymkhuid, ka jinglyngkar, ka jingmane bleithaw, ki jingkhiebitar, ka jingiapyneh, ki jingïapait, ki jingïaprat, ka jingpihuiñ, ka jingbuaid tanglang, ki jinglalot ha ka bam ka dih, bad kum kine kiei kiei. ...kito kiba mar mlien ïa kum kine kiei kiei kin ym ïoh ïa ka hima u Blei!" (Galatia 5: 19-21).

Haba phai sha ka Kospel ruh ngi shem ba u Jisu U maham ïa ngi na ka jinglong kangar bad ka jingkwah rhah jong ka doh. Namarba kum kane ka jait rukom im kam wanrah jingpynim da lei lei ruh. Hynrei lada ma ngi baroh ngi tip kumno ban kynshew ïa spah Bneng, kata kan pynkmen ïa u Blei.

Yn ïaroh ïa u Jisu Khrist.